【虎媽】安排囡囡學5個興趣班 遭老公怪責 港媽堅持為個女好
所謂「未雨綢繆」，不少家長一早為子女鋪定路，希望入讀好學校，擁有高學歷，將來有錦繡前程。本地一名人妻在討論區發帖，抱怨丈夫不明白她的一番苦心，反而怪她為女兒報讀太多興趣班。她催谷孩子，只是想助女兒入讀好學校，「點解枕邊人唔明我？」。
Photo from MamiDaily
為女兒升小一作準備
事主在「香港討論區」發帖：「老公話我成日逼個女，點解枕邊人唔明我？」她的女兒升讀K3，意味開學後不久，便要選擇一間學校，用作小一「自行分配學位」，若自行階段未能成功被學校取錄，便要參加「統一派位」，即俗稱「大抽獎」。萬一沒有獲派心儀小學，甚至不好彩被派到「寶校」，便要「叩門」面試，這個時候，一身絕技和多張證書是入學的保命符。不少家長會在早一、兩年前，安排子女報讀興趣班和各類比賽，目的是做靚Portfolio。
事主亦直言：「做人阿媽嘅一定好緊張，梗係想個女突圍而出，本portfolio靚啲，第日唔好彩要叩門都有兩手準備。」
Photo from MamiDaily
報多個興趣班被老公訓話
在女兒讀K2時， 事主已替孩子報名參加畫畫、溜冰同彈琴，「佢對溜冰興趣大啲，畫畫同彈琴就一般般，但為咗佢前途，我同佢講無得中途放棄，點都要學到底。」今年暑假，再修讀法文和奧數，事主補充：「暑假流流長，學4至5個興趣班都唔過份吧！」
但有一日，女兒跟爸爸訴苦，哭着說不想學奧數、畫畫和彈琴，「老公就即刻話我，點解成日逼個女，其實佢明唔明，我係為個女好？同埋法文係佢自己話想學架，最傷心係枕邊人都唔明白我。」
Photo from 《虎媽貓爸》劇照
「學咁多都係為咗個女好」
帖文發出後，網民幾乎一面倒反對事主，「一句為仔女好，害死了好多小朋友」，有人認為，一個4、5歲小朋友，需學4至5個興趣班，基本上沒有時間玩，質疑「個女學得唔開心仲要繼續，究竟係個女嘅身心發展重要，定讀到間band 1學校重要？」
事主回覆：「其實學咁多我都係為咗我個女好。」她認為自己不是虎媽，若是虎媽的話，便不止報4至5個興趣班，「考小學都要比學校睇佢識咁多嘢，學校先會考慮。個女喊可能只係嗰日扭計」。她希望女兒成材，將來有競爭力，可以成為一個出色嘅人，「講真我都會怨我阿媽細個冇咁樣谷我」。
Photo from MamiDaily
網民：搵適合學校好過最佳學校
網民繼續勸說：「興趣班係要興趣行先，小朋友冇興趣嘅話，就要轉玩第二樣。太細個就迫佢呢樣迫佢嗰樣，只會帶嚟反效果。做家長嘅，係要平衡motivation 同 pressure，過猶不及呀。」加上現時小學學位充裕，普遍收生不足，叫事主不用擔心「porfolio唔夠靚」而找不到好小學。但事主堅持：「我咁谷佢，都係為咗可以入到間好學校。」
有家長給予正面意見：與其搵間好嘅學校，不如搵間適合嘅學校，效果可能會好啲。「樓主，只要係一間不錯嘅小學，佢哋都能夠幫到小朋友升上好嘅學校，不用太刻意去爭一間最好嘅小學，最好嘅小學，受到嘅，當然好啦，受唔到嘅話，只會帶嚟反效果。」
延伸閱讀：
延伸閱讀：
Text：Mami Editorial
Source：香港討論區
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
