【32周仍未轉頭要開刀拎BB 臨產媽同你分享開刀走佬袋要帶啲乜】

上回提要：因為BB到32週都無轉頭，要由順產改為開刀，醫院亦都由九龍城轉移到山頂。（P.S.吉吉豬到開刀嗰日始終都係無轉頭，未出世就咁懶⋯）

由於已知幾時生產既關係，心情勁輕鬆～之後用一日時間慢慢執個走佬袋，當時執左：

產婦用衛生巾（黏貼裝）2包

床墊4塊（因為住4晚）

朋友俾既束腹帶

真空薑包x4

免沖洗洗髮噴霧

自備晨褸及睡衣

襪5對

膠拖鞋

梳洗物品

替換內衣

出院衣物

手機叉電器

但住院後既建議係：

產婦用衛生巾、床墊、束腹帶、免沖洗洗髮噴霧、睡衣、替換內衣都係可以唔帶的！因為醫院會提供產婦用衛生巾（扣裝）3包、床墊1包（已經有10塊）同紙底褲數條。

.

醫院仲會送一條有三段黏貼既束腹帶，到時治療師會教點用。

睡衣同替換內衣可以唔帶既原因係要經常餵人奶（明德係非常推崇人奶餵哺的），醫院提供既係開胸式睡衣以方便媽媽們餵奶（我嗰時係攰到bra都唔想戴，同埋戴左只會妨礙餵人奶既進度⋯嗰時老爺黎探班，我都只係用晨褸包住無戴bra既自己XD）。

至於免沖洗洗髮噴霧⋯住院期間係完全唔會想攞出黎用，所以放喺屋企stand by就ok啦⋯

.

而拖鞋就帶可以入洗手間同行出外面大廳既款式，軟綿綿嗰啲就不太合適啦。

我仲會建議準媽媽們帶定一罐心怡既1號奶粉入院以備不時之需（吉吉豬一出世就有頗嚴重既黃疸所以要即刻飲奶，我麻醉藥力未過哂又未有奶，醫院入面有售既1號奶粉又唔係我地決定用嗰款，所以吉豬爸即刻衝落山買左罐奶粉返黎）。如果唔想用公家奶樽，可以自備1至2個初生嬰兒奶樽，醫院有蒸奶樽機的。雖然護士們會記住媽媽們既自携物品，但自己都有責任好好看守住私伙物品呀～

.

另外有媽媽帶埋冷帽頸巾，準媽媽們可視乎自己體質決定帶唔帶。仲有臉盆係一個媽媽派一個，想用私伙的可帶摺疊臉盆～每位媽媽都會有一個熱水壺同一個凍水壺，唔想帶多樣野既準媽媽可以skip暖壺/保溫瓶～

.

交留床位費時可問清楚醫院包啲乜，咁就唔怕買多左無謂野啦～（我就係無問清楚嗰類人囉XD）

=========================

Text & Photos : 吉豬媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！