告別沙漠肌！10款精選潤膚乳滋拯救乾癢、粗糙肌膚

媽媽照顧小朋友經常要保持個人衛生，洗手洗得多，好易會覺得雙手好乾！加上最近日夜溫差大，天氣仲非常乾燥，洗手、沖涼後皮膚都會覺得繃緊又「乾噌噌」⋯⋯要避免出現甩皮、痕癢等乾燥問題困擾，每日沖涼之後喺肌膚仍然微濕狀態，搽上潤膚乳（Body Lotion）有助補充身體所需水分！

以下精選咗10款身體潤膚乳（排名不分先後）畀媽媽們愛錫下自己！有大人小童都用得、CP超高、清爽唔黏膩、一年四季都啱用、敏感肌適用等各款潤膚乳，仲會附上價錢方便大家「格價」，總有一款啱你心水，即刻睇落去喇！

1.　Aesop滋潤芳香身體乳霜（HK$265 / 100ml）
奢華潤濕乳用上含保濕嘅澳洲胡桃同檀香精油，適合特別乾燥嘅皮膚，深度保濕滋潤，搽喺身上仲會持續散發柑橘、香草同樹木清香。值得一提嘅係，呢個澳洲護膚品牌唔主張喺動物身上做測試，所以產品都係100%無殘忍而純素嘅。

2.　 Joseristine彩豐蘆薈燕麥溫和潤膚乳 （HK$35.9 / 400ml）
高CP值之選，一支結合紓緩、滋潤、防護3種功效，蘊含燕麥、蘆薈及乳木果等多種滋潤保濕成分。燕麥對紓緩濕疹、敏感同痕癢有顯著功效，幫助補充水份之餘，亦可以喺肌膚表面形成鎖水保護膜，達至深層長效嘅潤澤效果。而且不含類固醇、MIT及CMIT等化學成分，大人小朋友都用得。同系列仲有蘆薈燕麥溫和沐浴露，喺溫和潔淨同時滋潤肌膚，有助修復皮膚天然屏障，紓緩濕疹同乾燥痕癢；沐浴露同潤膚乳兩者一齊用，效果更明顯！

3.　 Johnson’s低敏滋養潤膚乳 （HK$36.9 / 500ml）
韓國熱賣款，含90%成分源於天然，不添加任何香料及色素，有效滋潤每一寸幼嫩的肌膚，同時鎖水保濕。醫學證明，純正溫和，質地透薄不黏膩，全日滋養肌膚，一年四季都用得。

4.　NIVEA舒敏修復潤膚露（HK$59.9 / 400ml）
以高效保濕成分維他命原B5同水潤美肌精華製成超效保濕配方，提供長效修復肌膚達72小時，深層保濕滋潤，幫助平衡肌膚微生態，防止水分流失。

5.　Eucerin pH5均衡潤膚乳液（HK$195 / 400ml）
針對乾燥同敏感肌膚嘅Eucerin pH5系列，經過專門配製，能令普通至乾性敏感嘅人體皮膚變得更有彈性、長效滋潤、減低過敏反應。輕盈質地，適合成人及小童日常使用。

6.　施巴®清爽潤膚露（HK$84 / 200ml）
施巴出名pH5.5溫和親膚配方，能夠促進皮膚弱酸性保護膜形成，「施巴®清爽潤膚露」更用上咗高水分清爽配方同甘菊精華，可迅速補充肌膚水分、緩和皮膚緊張敏感，適合中性、乾性或敏感膚質人士。

7.　NIVEA深層潤膚露（HK$49.9 / 400ml）
喺台灣曾經奪得連續6年銷售No.1嘅基礎身體保養乳液，特別加入牛油果油同維他命E嘅加強保濕配方，迅速為肌膚注入豐沛水分，同步鎖住滋潤，有顯著保濕同抗炎效果。

8.　Eucerin深層舒緩潤膚乳液 （HK$185 / 250ml）
配方採用具修復肌膚屏障同密集保濕功能嘅Omega-6脂肪酸（月見草油及葡萄籽油）、紓緩功效嘅Licochalcone A（甘草提取物）。有助修復肌膚天然屏障，加強肌膚彈性，經臨床證明適用於成人同3個月以上之兒童。

9.　Paula’s Choice 水楊酸煥采精華身體乳（HK$345 / 210ml）
呢支身體乳係台灣 @cosme 身體乳液排行榜嘅常客，佢創新嘅配方含有2%水楊酸，可以喺溫和滋潤肌膚同時清潔肌膚表面與毛孔內部老廢角質。絲滑質感，仲可以緩解肌膚輕度失水嘅問題。

10.　Natura Siberica 有機玫瑰果保濕滋潤身體霜－特潤（HK$258 / 370ml）
含玫瑰果提取物、西伯利亞人參、維生素C、A 高效膠原合成，具增強皮膚免疫力、改善肌膚痕癢及抗炎作用，專為沙漠肌同敏感濕疹皮膚而設。

*價格取自各網購平台所示之原價，不同商店之售價或有差異
*圖片取自網絡