【貸款】女大學生嫌屋企唔夠窮無法借full grant 網民鬧爆:祝你下世投胎做到窮人

mami熱話親子新聞

By Dara on 27 Feb 2024

Deputy Managing Editor

當自己成為父母，才明白父母的喜怒哀樂，以及無私的愛！

香港生活富裕，不少新一代從未經歷捱窮的滋味，對「窮人」並無深入概念。一名本地女大學生，嫌自己屋企不夠窮，因而不能在「專上學生資助計劃」中獲得Full Grant，更說：「羨慕窮人免費讀大學」，被不少網民鬧爆。

Photo from 《香港愛情故事》劇照

一畢業便孭住一身債

該名女大學生在討論區《Dcard》發帖，直言：「屋企唔夠窮，要借政府個貸款，意味住一畢業就孭住筆學債」。接着她指反而裏家夠窮的同學，因為獲得Full Grant，有政府供養讀書，畢業時又毋須向政府還錢。

她續指：「申請Scholarship嗰啲又係，好多都話有Financial needs優先，唔夠窮又冇份。到唔睇經濟狀況嘅（獎學金）我讀書又唔夠好，又冇我份。夾心階層真係好慘，話自己窮又一班人衝出嚟話佢哋仲窮，福利又冇我哋份，有錢人嗰種享受生活都冇我哋份。」

Photo from 《那些年，我們一起追的女孩》劇照

家庭入息超標

女生與家人租樓居住，雖然家庭收入不穩定，但仍超過資產審查的界線，因而不能申請full grant。她又稱大家都是憑實力考入大學，很羨慕窮人可以免費讀書及獲得沙紙。在她心目中，認為不需太窮也能符合資產審查，「我個親戚住私樓，可以去下台灣旅行，屋企得一個人返工都可以免費讀，我估窮極有限？」

Photo from MamiDaily

網民責想法片面

對於女生一番言論，網民十分反感，紛紛指：「咁都好羡慕，見到你咁講就知你未窮過」、「咁我祝你下世投胎做到窮人」、「都入到u啦諗嘢仲係咁片面」、「窮人屋企經歷過d 咩你知咩。同埋你自己讀好d 書就可以攞scholarship，攞唔到係你自己嘅問題，自己都無努力過就係度話咩羨慕窮人，真係唔知咩心態」。網民認為，即使取full grant的學生，雖然還有數千元生活/車費津貼，平心而論也不算太多，大部分人確實生活困難才會申請成功，學資處不是白白送錢給人使。

Photo from 《上流寄生族》劇照

Full grant網民分享生活不易

帖文亦引出不少取full grant的網民分享，貧窮的生活並非事主想像般輕鬆，「一有時間就返工，生活唔係做assignment、project 就係返工，完全冇所謂既social」、「出街見朋友，你有冇試過為慳錢去譚仔買淨米線，仲為咗一蚊而嗌少米，另外從不買飲品」、「由細到大屋企都冇去過旅行，都唔會出街消費 eg食飯，日日都係食住家飯」、「我細個中學果陣每日食個飯得$20，想食炸蝦飯$25，我要一日唔食飯第二日先食到個炸蝦飯」、「我一星期返4日工，返3日學。返工一日返足10個鐘，全部拎曬嚟交學費比家用，想儲少少錢都難，食譚仔嗌少米唔要嘢飲。好馨香咩？」。

Photo from MamiDaily

另一方面，亦有少數人對事主的想法深有同感，「其實我一直唔明點解我啲朋友拎到全額資助，佢哋係有錢去旅行的，住都住得好過我，而我屋企都唔係好有錢都申請唔到全部，有時聽到我都有少少唔服氣」，事主則回覆：「我完全係你個case！識人攞grant攞到去歐洲exchange」。其他網民則回應：「其實Exchange有啲都可以申請 Grant/Scholarship架，去完寫份報告，做個present之類就得，你有冇嘗試過去問下或者了解下？」更有人直接答：「我就係攞full grant都去到歐洲exchange嘅人，因為屋企窮所以為咗去exchange要不停返工先有錢，基本上無娛樂社交可言，用盡方法申請曬可以申請嘅獎學金同資助，就算真係去到都會極擔心錢嘅問題，唔通窮人攞full grant就冇見識嘅機會？」網友的回覆，是想讓事主知道，取full grant的人其實不是她想像般輕鬆。