【婆媳】新抱想請陪月奶奶嫌嘥錢鬧交鬧到動胎氣網民唔撐奶奶:仔女有自己選擇

mami熱話親子新聞

By Dara on 25 Feb 2024

Deputy Managing Editor

當自己成為父母，才明白父母的喜怒哀樂，以及無私的愛！

生完BB後，應不應該請陪月員呢？這個問題，隨時引發家庭衝突。一名姑仔分享自己媽媽與大嫂因請陪月一事鬧大交，大嫂更因此動胎氣，雖然明知媽媽一片好心，想為大哥省錢，但網民一致認為她「好心做壞事」。

Photo from 《BB來了》劇照

新抱搜集陪月資料

事主在《香港討論區》發帖，詢問網友「大嫂定媽咪有道理啲？」，原來她的大嫂懷有身孕，預產期是年尾，現時大嫂正在搜集陪月員的資料，有意在誕下孩子後，由陪月員幫忙坐月。

事主的媽媽知道後，連忙阻止新抱請陪月，事主說：「媽咪就話唔使嘥錢請陪月，佢去照顧大嫂咪得。我feel到大嫂唔係咁鍾意媽咪走上佢哋屋企，所以就話唔使麻煩媽咪，畀錢請陪月都一樣。媽咪就覺得外人照顧一定冇自己屋企人照顧咁細心，養BB要用好多錢更加唔想佢哋嘥冤枉錢。」

Photo from 《BB來了》截圖

鬧交鬧到大嫂動胎氣

意見不合，本來不算太大件事，但因婆媳二人各不相讓，一人一句之下，便小事化大。事主說：「結果佢哋為咗半年後嘅事鬧大交，大嫂仲動埋胎氣，阿哥知道咗呢件事之後第一句竟然係鬧媽咪多事，話媽咪唔應該咁樣同佢老婆講嘢。」

作為女兒兼姑仔，亦不想自己媽媽去大嫂家幫忙坐月，她說：「坦白講媽咪心態都係想幫你兩公婆慳錢，先話唔想你哋請陪月，但係阿哥咁講嘢我真係覺得過份咗.....私心嚟講我都想大嫂請陪月好過媽咪日日走去佢哋屋企，媽咪去佢哋屋企成個月咪變咗我要做家務.....」

Photo from MamiDaily

奶奶好心做壞事

雖然事主認為媽媽是想幫忙大哥大嫂省錢，寧願自己辛苦一點，但網民齊撐大嫂，覺得事主媽媽好心做壞事。「有能力當然請陪月啦」、「老人家好多時候有心無力」、「大肚婆開心最重要，叫你阿媽講少兩句喇，請陪月咪請陪月囉，咩咁大件事啫，仲要搞到大肚婆動胎氣，真是不必」、「雖然你阿媽為你大哥大嫂慳錢呢點去諗係好事，但你阿媽亦唔識時務，所以...搞到大家不歡而散」。

網民亦認為兩代人有兩種做法，容易意見分歧，而且作為BB父母，他們絕對有權利選擇認為合適的方法。「樓主媽媽係一番好意，但既然大嫂兩公婆有自己選擇，又何必將自己意願強加他人身上」、「我覺得佢哋有自己選擇權，最重要係用自己錢負擔得起就請人照顧」、「而家咁都鬧，如果你媽真係上去湊孫，到時更日日嘈。阿嫂就係唔想有機會搞到面阻阻先搵陪月湊，兩代人對湊BB要求唔同，人哋係親生阿媽，一定想自己決定」。

Photo from MamiDaily

請陪月員物有所值

另一方面，有經驗的網民覺得請陪月員物有所值，新抱輕鬆坐月養好身體，奶奶得閒亦可隨時探望孫兒。「如果俾得起兩萬幾蚊，真係軍軍真真請陪月好過，我個陪月姨姨日日由開工嗰下做到收工，煮午飯晚餐、燉湯、中午整個糖水我食、煲水我沖涼，照顧晒BB，我食飯啲碗碟同BB啲奶樽同衫都係陪月洗同晾」、「陪月好專業㗎！點樣食療補身，奶奶識D咩？去考張證書，先可以考慮俾佢做！」