【準媽媽突然穿羊水 立即飛的入院 入聖保祿醫院生仔待遇有幾好】

就喺放產假嘅第二個星期，個女喺臨天光6am終於嚟到門口啦！

明明之前睇啲報告話多數媽媽會見紅或者宮縮先，得1x%係穿水先，咁都畀我中，無得沖埋涼先閃仲要盡快摷埋老公起身一齊走佬！由於我去私院生，所以無得call白車，好彩都好順利call到的士。「口裡說不，身體卻很誠實！」話唔緊張就假嘅，我哋兩個上咗的士就一直無出聲，師傅可能感覺到我哋沉默嘅氣場，15分鐘就由將軍澳到St. Paul！

落車即刻上產科「報到」！老公填緊表嘅時候我就同姑娘對文件，之後就安排咗我去胎監（即係check BB心跳、胎動、宮縮度數），再之後姑娘就幫我檢查係咪真穿水同子宮頸開咗未（姑娘/醫生都係用手指伸入去檢查開咗幾多度，同埋摸唔摸到胎頭），姑娘話只係得1度，oh～啱啱開門乍。。。

由於我中咗個B鏈，加上又穿水先，所以一入院就要打抗生素，同埋一陣到產房就會打埋催生，都好嘅～速戰速決！另外一邊手就要抽埋血，一入院已經吉咗幾支針，其實心情上無乜特別，因為同跟住要面對嘅人生大事「生仔」只係雞毛蒜皮嘅事。。。

講開又講，我去醫院嘅時候只係整咗一塊特長夜用，原來係幾危險！危咗原來我初頭嘅漏尿、滲尿只係少兒科！我檢查完起身嗰下係好似瀨屎咁！！！好彩去到醫院已經有晒床墊盛盛，唔係真係搞唔掂！

檢查晒都8點幾，姑娘安排我入房安頓咗先，我選咗最經濟嘅4人標準房，房入面有2個廁所（其中1個有浴室），仲有冷熱水機、free wifi，而每個床位都有獨立電視、插頭、儲物衣櫃同匣萬。

廁所：

床位：

個人空間多少少，所以我只係拎咗個細小嘅走佬袋，有齊入院文件、化妝袋、衛生用品同少量食物，其他住院嘢就放喺「走佬喼」，就係平時用嚟hand carry嘅細喼一個。

老公就衝去對面買早餐畀我，我仲以為主診醫生無耐就到，點知話中午先到，姑娘就叫我去換網褲同3塊衛生巾，3塊！！？原來對付嗰啲瀨屎咁流出嚟嘅羊水，就要前後一塊上面再疊多塊咁樣3塊厚厚墊住先接得住，真係長知識！

說時遲那時快老公已經買咗魚柳包畀我（臨生仔識食梗係食老麥！XD），佢嗱嗱聲食完幫我收拾埋就返屋企幫我拎埋「走佬喼」過嚟。其實我當時又未痛，就開始玩電話、通知朋友同事。

聖保祿生仔套裝已經包括以下住院用品：

孕婦衛生巾、網褲、床墊、沖洗瓶

小毛巾、牙刷牙膏、沐浴露、漱口杯、梳子

紙杯、飲管、面紙

基本上入院只需要準備：

－入院信、驗血報告同其他相關報告、醫院按金收據同丈夫身份證副本（如果丈夫一齊入院就直接畀正本）

－個人護膚品（我帶咗潔面濕紙巾、保濕乳液、保濕精華、BB Cream、潤唇膏）

－睡衣（開胸睡衣方便餵人奶）

－拖鞋

－手機同charger

－清毒濕紙巾

－BB同自己出院衫（可以叫屋企人喺出院當日先拎嚟，因為我用喼所以帶埋）

St. Paul仲包咗每朝嘅早餐（有3款揀！），方便埋會送飯嘅家人，邊有人咁早就送早餐嚟呀～係咪！

喺私院一定唔怕餓親，因為仲有Menu等緊你！都係茶餐廳/快餐店嘅食物同價錢，原來都幾經濟㗎！

（續）

Text & Photos : Aminn

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！