晚晚瞓覺都敏感發作？呼吸系統科醫生：可能係瞓覺惹禍！

By Kexta on 04 Aug 2022

Senior Project Editor

人人都想身體健康，但有啲人一到夏天就會濕疹發作，一接觸到花粉、微塵就會引起鼻敏感，又或者一食到特定嘅食物就會出現過敏性腸胃炎，其實呢啲都係常見嘅過敏疾病之一。但你有冇諗過再平凡不過嘅瞓覺時間，都有可能令你或屋企人將敏感一事惹上身？

本港常見致敏原竟然係塵蟎？！
香港港安醫院—荃灣及香港港安醫院—司徒拔道喺2016年3月至2021年3月共5年期間，對超過2300個樣本進行咗ImmunoCAP specific IgE血液檢測嘅數據分析；研究顯示好多病人對d1屋塵蟎 D. Pteronyssinus歐洲室塵蟎同d2屋塵蟎 D. farina美洲室塵蟎，產生高濃度特異性免疫球蛋白E抗體，即係代表塵蟎好大機會係引致過敏症狀嘅主要原因！而研究中簡稱m3嘅真菌烟曲霉位、e1嘅貓皮屑、e5嘅狗皮屑、f1嘅蛋白、f24嘅蝦、i6嘅蟑螂、f2嘅牛奶同f23嘅蟹緊隨其後。

Photo from 香港港安醫院—荃灣及香港港安醫院—司徒拔道於5年間對超過2300個樣本進行ImmunoCAP specific IgE血液檢測之數據分析

香港港安醫院－荃灣嘅呼吸系統科專科廖頌雅醫生補充，塵蟎嘅排泄物或已死嘅身體殘骸有可能係引致過敏人士日日冇覺好瞓，或者每日起身都敏感發作嘅致敏原！加上香港天氣濕熱，屋企內嘅床褥、枕頭、被舖、地毯、沙發、毛公仔、窗簾、厚衫等容易積存塵埃嘅物件，都好有可能存活咗大量塵蟎！

過敏症知多一點點
好多人都誤以為身體唔夠強壯或者食錯食物，所以先會出現敏感症狀。事實上，過敏症係由於身體對一種或多種無害嘅物質，產生過激嘅免疫反應(Hypersensitivity Reaction)。但對於有過敏體質嘅人(Atopy)嚟講，呢啲無害嘅物質就會成為佢哋嘅致敏原 (Allergen) ！

致敏原嘅種類繁多，不論係透過吸入式或接觸式觸及到致敏原，都有機會引起過敏症。過敏體質人士嘅身體會對致敏原產生過量嘅特異性免疫球蛋白E (Specific IgE / sIgE) ，從而引發過敏症狀；本港常見嘅過敏疾病包括：濕疹、蕁麻疹、鼻敏感、過敏性腸胃炎、哮喘。

點樣知自己係咪過敏體質人士？
基於特異性免疫球蛋白E抗體嘅濃度同過敏症狀有住密不可分嘅關係，要知道自己係咪屬於過敏體質，可以透過「IgE血液測試」得知。

Photo from IgE血液檢測儀器

廖頌雅醫生指，「IgE血液測試」可以同時檢測血液樣本對多種致敏原嘅致敏反應，提供持續、廣泛而準確嘅結果，有助醫生確定診斷結果同提供相應嘅治療。「IgE血液測試會以Specific IgE嘅濃度去顯示結果，0.1 至 2 kUA/L濃度屬於極低至低程度、2 至 15kUA/L濃度屬於中等、15或以上kUA/L濃度屬於高至極高程度；即係話當個濃度愈高，代表病人對嗰隻致敏原愈有可能引發過敏反應」。

如果懷疑自己屬過敏體質人士，建議先諮詢醫生意見。