「怪獸家長」嘆身不由己 ： 不為贏面子， 只係唔想輸！

香港嘅教育制度，令到好多家長都好無奈！有啲家長主張「還子女一個快樂童年」，努力為子女尋找Happy school 。有啲家長就不甘輸在起跑線，想小朋友入間好學校，要「谷」亦難免！雖然兩種選校立場各走極端，但係諗深一層，都冇對錯之分嘅，只能夠嘆一句：各有各的無奈！社交平台上有一個自認係「怪獸家長」嘅媽媽，不時會在網誌內分享唔同嘅升學攻略，幾經轉載，引嚟家長的激烈討論，當然有人鬧睇到心寒，但係亦都有家長認為該名媽媽講嘢貼地！小編節錄部分金句，睇吓又係咪你嘅心聲嚟嘅？

一個名為「國皇之家生活事」嘅FB專頁，網主文迪媽媽自稱「正致力做一個怪獸家長」，要將全副心機俾哂兩個囝囝！最近佢就報讀幼稚園同小一面試高峰期發表咗一篇「幼稚園大作戰」嘅文章，當中有唔少見解，相信都係好多家長嘅心聲！

1）揀催谷型幼稚園就係怪獸家長？

「大家唔好以為得愛心家長先知"快樂童年"嘅大道理，佢哋嘅諗法係仲長遠⋯唔想佢開心三年(K1-K3)之後唔開心六年~小朋友讀到，又讀得開心，做咩唔比佢讀，而家起跑線"先"辛苦一兩年，考到間好嘅小學就會有朋輩效應，學校資源/學習上亦會事半功倍」

2）人哋谷又話你知咩！？

「表面話一張Cert 都唔考嘅愛心家長，可以最後收埋上十幾樣興趣班妳地都唔知，到時升小一次過Show Hand 出黎，妳先笑自己太傻太天真」

3 ）小朋友咪happy，你知咩？

「小朋友嘅潛能係可以經學校／老師激發出嚟，好多家長都以為小朋友會讀得好辛苦，追功課會比其他Happy School 辛苦。但係實際是唔係嘅！人哋行緊個課程設計經過咁多年嘅"fine tune"，都唔係浪得虛名」

4 ）跟教育局指引？死得！

「K3 等小朋友肌肉發展好,先好揸筆呀？事實又想同大家講定幼稚園 K2 下學期，已經係第一間嘅私小interview (音小)，K3 9月一開學已經一連幾個月嘅面試旺季，K3 先嚟抄寫，人哋週記／ 文都自己作埋啦~」

5 ）呢個世界就係唔公平！

「"贏在起跑線 " "輸在起跑線"是有的 !!而且日日都發生緊 !! 只不過係睇妳係呢個咁不公平既情況下點面對~有啲媽媽想入培正小學／培正中學，咁妳當然要入培正幼稚園，想入培正幼稚園，就要填家長問題，有人流傳過要Show 到妳屋企同培正有咩"關係"，有啲會對"舊生"有着數，易入啲 (一家人理念)，唔係一家人，機會又少啲」

6）都是制度惹的禍

「而家嘅小學日日都要小朋友做咁多功課，根本無時間玩， 不過唔適應／迎合，唔通日日唔交功課咩？若果有$(或者將來有$)，一早已經送咗 ／計劃小朋友出國讀書， 咁成件事就簡單好多」

「相信大部分家長，都係身不由已，"谷"唔係為咗贏面子，本身自己都唔想谷，只係為咗唔想"輸"。 唔知大家有無試過小朋友升小一？ 冇人事、冇關係、冇分，要將小朋友小學生涯交俾大抽獎，一組Lucky Number」

Text: Mami Editorial
Photo Source: Presslogic