download MamiDaily 親子日常 app
【怪獸家長】6歲孩上3堂鋼琴課港媽嫌彈不到似樣的歌 老師感無奈拒再教令家長惱羞成怒

【怪獸家長】6歲孩上3堂鋼琴課港媽嫌彈不到似樣的歌 老師感無奈拒再教令家長惱羞成怒

mami熱話 親子新聞
By Louisa on 24 Jan 2022
Digital Editor

為了讓小朋友跟心儀鋼琴老師學習,家長可以去到幾盡?一名鋼琴老師日前在網上分享,稱有名港媽送6歲小朋友來學鋼琴,不過才上了3堂,家長便心急問「幾時先會彈到有人識嘅歌?」,令鋼琴老師相當無奈並拒絕再教。最初港媽對此感到憤怒,但最後她竟求老師繼續教?

港媽為孩子報琴,卻不願提供基本資料。Photo from TVB《親親你好媽》劇照

家長報琴拒絕提供資料

該名鋼琴老師在Facebook專頁「生仔要考牌系列」投稿,她稱自己是兼職教琴,近日有一名家長傳訊息給他,指想為小朋友報學琴。於是琴老師循例問一些基本資料,例如「小朋友幾大」、「有無學過琴」、「係咪學開想轉老師」等,豈料對方通通都不想回應。

家長不願配合

於是老師惟有解釋稱要配合小朋友的年紀,準備適合的進度和教授方法。甚至若小朋友年紀真的太小,有機會因為手指未發育好而不適合彈琴。豈料家長卻不賣帳,反駁指「適唔適合彈琴係由家長衡量同決定,老師只係負責收錢同教,唔到你哋老師話事」。

港媽在小朋友學琴途中,狂問問題打斷課堂。Photo from MamiDaily

再有家長欲報名

最終老師因雙方想法不契合,於是便婉拒報名要求,而對方再回覆「我未見過學琴都要問咁多嘢」,此事便告一段落。大約一個星期後,老師又收到另一名家長的訊息:「你好!想幫我個6歲小朋友報琴」。這次老師順利「問晒我要問嘅嘢就收咗呢個學生,同埋約好時間嚟我度上堂」。

小朋友沒脫鞋便衝進屋內

後來家長帶同小朋友到老師的家上堂,一開門小朋友未除鞋便衝進屋內坐在琴櫈上,而媽媽則緩緩在門前除鞋。老師見家長對小朋友的舉動無動於衷,便跟小朋友說「過嚟除咗鞋洗咗手先」,同一時間老師的家傭見狀亦「拎咗地拖出嚟拖返個地」,而家長「無唔好意思之餘,仲有少少皺眉頭」。

港媽特意換另一電話再次報名。Photo from MamiDaily

家長不斷在課堂時發問

當時老師不以為然,便跟小朋友開始上堂。課堂才開始不久,家長便在後方連番發問:「點解上咗咁耐,連一個音都未俾佢彈過嘅?」、「點解你無琴書俾佢嘅?」、「點解你唔開個拍子機嘅?」如是者小朋友上了3堂,老師稱該名學生表現正常,「唔係特別叻,又唔係特別慢,上咗3堂後,佢彈到琴書嘅頭一首歌,基本上咁初級都唔會係啲咩歌」。

港媽嫌教學進度慢

而學習進度卻引來媽媽不滿,她又開始心急發問:「幾時先會彈到有人識嘅歌?」、「幾時先可以考級?」、「幾時先可以自彈自唱?」一連串提問令老師大感無奈,由於媽媽打斷課堂的狀況非首次發生,於是老師便直接回應:「媽媽!我哋都上咗幾堂啦,下次小朋友可以試下自己上堂,夠鐘你再嚟接返佢啦,我其實所有學生都係咁㗎,咁樣佢哋可以專心啲」。

港媽不滿事件被老師放到網上公審。Photo from TVB《親親你好媽》劇照

港媽大反應回應

豈料老師的回答莫名其妙地惹怒媽媽,對方立即大反應反駁,「我都忍你好耐,跟你學琴有寶咩?你特別叻呀?學琴前又咁多嘢問,上堂我睇住又唔得。我都未計你第一堂,你叫你工人拖地,呃咗我3分鐘呀,你而家同佢上多3分鐘,我哋唔學啦,上咗幾堂都彈唔到首似樣嘅歌!」

發現港媽是第一次查詢的家長

此時老師才恍然大悟,發現原來眼前的媽媽就是那位不願回答基本資料的家長。於是老師便決心不再教這個小朋友,反擊稱「如果我唔叻,你又做咩要換個電話再message我?3分鐘我係唔會教,個地係你個小朋友無除鞋整污糟,我唔收你清潔費,呢堂都免費,你哋請回啦!」

最終港媽竟再次要求老師繼續教她的小朋友。Photo from MamiDaily

港媽不滿被公審

帖文就此結束,不過後來事件引起網民熱烈討論,當中不少聲音都是批評港媽的言行。後來港媽見自己被公審感不忿,於是同樣在「生仔要考牌系列」投稿抱不平,她表示看到老師的帖文後「火都嚟」,又問對方「有乜咁巴閉」,並斥責老師用來教琴的鋼琴牌子August Forster「聽都未聽過」。她直言「我唔搵你教大把人教!我身為家長擔心進度有何問題,我在琴行的老師都唔係咁大牌咁無品上網唱人!」

不過最終結局令人意外,老師今日再次發文,表示後來那位家長再次聯絡他,希望他可以繼續教其小朋友。原來該名家長早已「起底」鋼琴老師,知道他會帶學生做公開表演,不過卻在孩子學琴期間不滿進度緩慢才會發爛,因此她最終還是希望小朋友可以繼續學,並解釋其言行只是因為心急和緊張而一時衝動。

Text:Mami Editorial
內容由「生仔要考牌系列」授權轉載

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道