【英語學習】港媽籌備移民豪擲6萬為BB買英文教材 美國語言教育家:用來吃喝玩樂更實際

【英語學習】港媽籌備移民豪擲6萬為BB買英文教材 美國語言教育家:用來吃喝玩樂更實際

教育路 教育心得
By Irisa on 19 Dec 2021
Digital Editor

我嘅一位香港朋友準備做媽咪,上個月用六萬蚊買咗一套英文教材。我笑佢:「BB仲喺肚裏面喎!」點知朋友輕描淡寫道:「唔早㗎啦,好多人用埋嚟胎教,仲直接買多元智能套裝。可惜我唔夠 Budget,唯有買住基本版先。」六萬蚊,絕對唔係一個小數目。喺父母眼中,呢種「非常」早已成為「正常」。借用朋友嘅話:「呢啲錢唔慳得,將來如果移民,唔識英文就頭痕。」

根據中大香港亞太研究所最近發佈嘅資料,42%受訪港人打算移民。Photo from 相片授權:陳曉瑋 Vikey Chen「香港Vikey移民美國」版主

根據中大香港亞太研究所最近發佈嘅資料,42%受訪港人打算移民。大勢所趨,我嘅朋友亦難抵洪流。好多父母都想仔女英文嘞嘞聲,用咗好多時間、精力、當然仲有金錢,都成效甚微。到底點先可以事半功倍,將學英文變成一件自然好玩嘅事?

「一人一語」(One Person, One Language)最有效

我嘅美國朋友 Giancarlo Di Mizio,佢嘅一對仔女精通三種語言:英文、意大利文、西班牙文。從事語言教育及研究十幾年,並就職 Indy Language Center 教育總監,佢認為要培養多語言兒童,最有效嘅方法係「一人一語」(One Person, One Language),而昂貴教材只係其次。

「一人一語」係指,與小朋友日常接觸嘅人,只講各自擅長嘅一種語言。對 Giancarlo 嘅仔女而言,媽媽講英文、爸爸講意大利文、保姆講西班牙文。有啲父母擔心,呢個做法會造成語言混淆,最後搞到兩頭唔到岸。但 Giancarlo 認為,只要大人貫徹始終,堅持只講一種語言,小朋友會學識根據談話對象轉換語言。多語言環境中成長嘅小朋友,都可以「自動轉台」輕鬆無難度。

美國語言教育家 Giancarlo Di Mizio,一對仔女精通三種語言:英文、意大利文、西班牙文。Photo from 相片授權:陳曉瑋 Vikey Chen「香港Vikey移民美國」版主

切忌唔鹹唔淡「中英夾雜」

「一人一語」係個好方法,不過並非所有父母都擅長英文。Giancarlo 話,如果你英文半桶水,不妨搵他人代勞,千其唔好中英夾雜。例如「呢個Apple 好 Red」,喺同一句話裏面不斷「轉台」,只會搞到仔女頭都暈。打亂語言學習,阻礙佢對不同語言嘅判斷。

我有位香港朋友,佢嘅工人姐姐無論煮飯定做家務,都完全無天分。但係朋友好滿意,而且續約再續約。我不解,朋友一語道破:「呢個姐姐英文好得,阿女英文咁好全靠佢。」語言源於生活,朋友明白呢個道理。自知英文麻麻嘅佢,選擇搵外援,將英文融入阿女嘅生活。呢位工人姐姐洗衫、煮飯唔在行,佢嘅 Selling Point 係一口高水準嘅英文。朋友如獲至寶,各取所需。

如果你英文好好,家中又有菲傭,不妨沿用「一人一語」原則,畀仔女學埋菲律賓文。我嘅一位朋友,當年屋企菲傭識英文,但係父母要求菲傭只講菲律賓文(Tagalog)。久而久之,朋友對菲律賓文就駕輕就熟。佢話:「啲親戚仲笑我阿爸阿媽,唔明仲咩學啲偏門嘢。」

40年後嘅今日,朋友佩服佢父母嘅遠見。佢碩士畢業後,加入一間行內數一數二嘅VC創投公司。因為識菲律賓文,公司安排佢飛過去半年,實地考察並研究菲律賓農業投資市場。呢個經歷,成為佢喺創投界大展拳腳嘅踏腳石,至今平步青雲。

與其用六萬蚊買教材,不如攞去同一班講英文嘅朋友吃喝玩樂!Photo from 相片授權:陳曉瑋 Vikey Chen「香港Vikey移民美國」版主

廣告
廣告

善用「情感策略」同「感官刺激」開心學英文

Giancarlo 一連4集講「學英文嘅各種竅門」。佢覺得語言學習講求方法:「與其用六萬蚊買教材,不如攞去同一班講英文嘅朋友吃喝玩樂!」佢好認真咁講:「社交實際上係運用情感策略,融合感官刺激。既輕鬆自然,又事半功倍。」

當你心情好,係咪一切都充滿希望,甚至覺得無所不能?Giancarlo 話,積極嘅情緒會將你嘅學習潛能發揮到極致。而吃喝玩樂帶來嘅感官刺激,有助記憶新語言。佢仲話,腦神經嘅發展將持續一生,大腦充滿可塑性。新嘅生活體驗及人際交往,都會幫助腦神經形成新迴路。所以,當你同講英文嘅朋友,一齊做有趣嘅事,進行大量有背景有意義嘅對話,大腦會將英文內化。假以時日,你自然可以直接用英文思考同表達。

我嘅一位朋友鍾情法國文化,因為喺大學工作,幾年來識到不少法國交流生。疫情前,佢一家人幾乎每個週末,都會帶啲法國學生捐窿捐罅周遊香港。5歲嘅阿仔雖然無上過法文班,但已經可以同法國友人溝通無阻。朋友嘅無心插柳,正係「吃喝玩樂」情感學習法嘅完美詮釋。

Giancarlo 話,吃喝玩樂帶來嘅感官刺激,有助記憶新語言。Photo from 相片授權:陳曉瑋 Vikey Chen「香港Vikey移民美國」版主

掌握竅門,萬變不離其宗

不過,如果識唔到外國朋友,可以點幫仔女學英文?Giancarlo話,如果父母已經買咗教材,其實都可以好好利用。例如,父母不妨引導仔女,將鍾意嘅英文故事改編。呢個再創作嘅過程,可以刺激好奇心同創意,比單純記憶故事內容更有效。或者,選取教材中好聽嘅英文歌,同仔女一齊加入舞蹈元素。邊唱邊跳,開心之餘又刺激感官。

你就算唔買教材,網絡都有好多免費資源。只要你明白「積極情緒」同「感官刺激」嘅重要,就可以自創適合仔女嘅方法。掌握竅門,萬變不離其宗。如今「移民潮」持續,父母不惜揼本幫仔女學英文。如果唔想洗冤枉錢,就切勿心急亂投醫。無論你想仔女搵份好工,定係有計劃移民,抑或想下一代睇得明「美國獨立宣言」嘅天賦人權同自由平等,學英文都要記得理性消費。

Text:Mami Editorial
帖文授權轉載:香港Vikey移民美國(陳曉瑋 Vikey Chen)

Giancarlo 係YouTube「香港Vikey移民美國」,一連4集講「學英文嘅各種竅門」。Photo from 相片授權:陳曉瑋 Vikey Chen「香港Vikey移民美國」版主

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道

Share to Facebook
Our Videos
官方影片
You may also like
你可能也喜歡
【升讀小學】小一自行分配學位幾分先夠入心儀學校? 公開必入名牌小學的方法
教育路
6 hours ago
【升讀小學】小一自行分配學位幾分先夠入心儀學校? 公開必入名牌小學的方法
【恐龍家長】幼童唔識食飯亂著鞋 自理能力低邊個縱成? 家長嫌麻煩唔想教 幼教老師嬲爆
教育路
2 days ago
【恐龍家長】幼童唔識食飯亂著鞋 自理能力低邊個縱成? 家長嫌麻煩唔想教 幼教老師嬲爆
【報考直資】K2學生無得唞 出年升小申請直資要快手 報名日期間間不同 家長搞到亂晒籠?
教育路
3 days ago
【報考直資】K2學生無得唞 出年升小申請直資要快手 報名日期間間不同 家長搞到亂晒籠?
【教育爭論】學生知識愈學愈早 家長認為太催谷  傳統學校有難處 補習老師助入名校受尊敬?
教育路
4 days ago
【教育爭論】學生知識愈學愈早 家長認為太催谷 傳統學校有難處 補習老師助入名校受尊敬?
【老師辛酸】兒子輕微撞傷好小事 老師傳訊息狂道歉 網友直呼:現在有太多愛投訴的怪獸家長
教育路
5 days ago
【老師辛酸】兒子輕微撞傷好小事 老師傳訊息狂道歉 網友直呼:現在有太多愛投訴的怪獸家長
【教育迷思】幼稚園生壓力大 在校爆喊「唔想做」網友感嘆 香港讀書想要Happy很難嗎?
mami熱話
6 days ago
【教育迷思】幼稚園生壓力大 在校爆喊「唔想做」網友感嘆 香港讀書想要Happy很難嗎?
Hottest Articles
最熱文章
【父母教養】小朋友主動在巴士上讓路     被讚好孩子    反遭父親當眾喪鬧指責一件事
mami熱話
a day ago
【父母教養】小朋友主動在巴士上讓路 被讚好孩子 反遭父親當眾喪鬧指責一件事
【恐龍家長】幼童唔識食飯亂著鞋 自理能力低邊個縱成? 家長嫌麻煩唔想教 幼教老師嬲爆
教育路
2 days ago
【恐龍家長】幼童唔識食飯亂著鞋 自理能力低邊個縱成? 家長嫌麻煩唔想教 幼教老師嬲爆
【報考直資】K2學生無得唞 出年升小申請直資要快手 報名日期間間不同 家長搞到亂晒籠?
教育路
3 days ago
【報考直資】K2學生無得唞 出年升小申請直資要快手 報名日期間間不同 家長搞到亂晒籠?
【婚姻大事】女子月底結婚家人竟私下賭1件事 準新娘知道後嬲爆取消婚禮
mami熱話
2 days ago
【婚姻大事】女子月底結婚家人竟私下賭1件事 準新娘知道後嬲爆取消婚禮
【複雜關係】前妻榨乾前夫金錢 十年來不讓父女見面 見前夫再婚  一動作擾亂幸福家庭
家庭關係
3 days ago
【複雜關係】前妻榨乾前夫金錢 十年來不讓父女見面 見前夫再婚 一動作擾亂幸福家庭
【母嬰同睡】嬰兒枕頭蓋臉向母摑四巴掌自救 媽媽熟睡無反應 網友嗌好危險
mami熱話
a day ago
【母嬰同睡】嬰兒枕頭蓋臉向母摑四巴掌自救 媽媽熟睡無反應 網友嗌好危險