早前本報曾經報道，商業電台節目《早霸王 Good Morning King》在 Facebook 專頁舉行投票，邀請網民選出「十大婚禮MC講錯最好笑嘅說話」。（詳見：「結婚蛋糕代表新人嘅感情，我哋而家一刀切落去」　婚禮MC講錯最好笑的15句說話）其實除了MC口誤，婚禮這個喜慶場合亦不時發生大大小小的「蝦碌事」。昨日鄭中基就在社交平台邀請網友分享「一人一個結婚之匪夷所思」，大談婚禮上的搞笑故事。不少網民都踴躍暢談自己的婚禮奇聞，就連有多年婚禮主持經驗的林盛斌 Bob 亦有留言分享。

Photo from 暖男爸爸 劇照

編輯精選10個最搞笑的婚禮「爆笑蝦碌事」

1/ 林盛斌 Bob 親身經歷

7-8年前試過有一次個外父飲大咗，去到婚宴尾段突然上台攞咗我支咪。然後佢指住台下面個新郎哥講：「你呀，記住對我個囡好啲呀！如果唔係，我x爆你老母㗎！」（含有粗口）之後全場靜晒，最正嘅係新郎個阿媽（即係奶奶）當時坐咗喺主家席嗰度食緊個伊麵。然後我就攞返支咪話：「外父放心啦，為咗保護屋企人，我相信佢一定會對你個囡好好㗎！同埋奶奶都70幾歲啦，不如就咁算啦！」跟住全場大笑兼拍手掌，最緊要嘅係奶奶都企咗起身拍晒手！

2/ 想結婚變離婚？

新郎係未開席前就已經飲醉咗，然後四圍喊住同人講「我唔想結婚呀～」

3/ 兄弟飲醉啦

有個兄弟好醉咁攬住個人，仲好興奮咁行過去同新郎講：「我介紹個朋友你識，好有義氣㗎，佢叫長毛哥！」然後新郎好冷靜咁同個兄弟講：「嗰個我老豆嚟！」

4/ 紅事變白事？

係道風山證婚，MC講咗歡迎來到寶福山（骨灰龕場）

5/ 話中有話？

MC是新娘閨蜜：「新郎你真好彩！我見過佢咁多個男朋友，最後畀你帶得走 Mary！」

Photo from 玩嘢王 節目截圖

6/ 老爺擺明唔妥新抱？

之前做婚禮攝影助手，見過最爆係有次老爺搶咪上台話要送首歌畀一對新人祝福吓。當時無樂隊佢就決定清唱，佢一開口大家立即鴉雀無聲……因為當時老爺好有感情地唱：「分飛萬…里，隔…千…山」，佢台下啲朋友仲一齊大合唱。未唱完新娘已經燶晒面，台下仲有條友大叫 encore，當然老爺都唔想掃大家興，所以清一清喉嚨就勉為其難咁只係再唱一首咁多，首歌仲要係「如果命?早註定分手…」到底係咩玩法呀？

7/ 大喜日子咁嚟講笑？

新娘皮膚好白，新郎皮膚好黑，婚禮上MC話「一對新人一黑一白，好似黑白無常咁襯…」結果全場靜晒。

8/ 已經預想到新郎同外母嘅關係將會係凶多吉少

有次去同事婚禮，佢啲朋友親戚都好靜，好似大家係唔熟嘅人圍埋一齊普通食餐飯咁。之後話請外母上台講幾句說話，咁大家拍完手掌之後都好安靜聽佢講嘢。外母喊晒講到甩甩咳咳，突然佢好似放炮仗咁放咗一連串好大聲嘅響屁。當時全場都聽得好清楚，大家都忍住唔笑，但個新郎竟然一路上台一路大笑，後來外母匿咗入化妝房好耐。

9/ 玩新郎唔好玩咁盡

我都明啲姊妹們要玩新郎過下癮，但玩下甜酸苦辣咪好囉！係都要玩屎尿屁、尿片、M巾、Nutella 咁？開席播出嚟嗰陣，MC係咪要講：「大家食緊嘢嘅同時，不如我哋睇下新郎今朝食屎嘅情況啦！」

10/ 真正嘅鴻運當頭？

一對新人係台上開香檳，點知個酒塞射咗落坐係主家席嘅老爺個額頭上，當時全場笑到癲，而新人就好尷尬。

延伸閱讀：
​​【發噩夢】魏如萱3歲兒親述詭異夢境　媽媽因1句話秒速從睡夢中驚醒

延伸閱讀：
【麻煩親戚】新郎因1事趕走婚禮上所有女親戚　霸氣護妻舉動獲網民激讚

Photo from 我要做Model 電影截圖

Text : Mami Editorial
Source : Ronald Cheng 鄭中基 FB