【見紅陣痛足4日 幸有老公在旁 愛，從來都唔係只係講出口】

回想已經成為左P牌媽媽4個幾月，每日見到小瑜B既笑容絕對係一個獎勵，一日入面既所有憂愁同壓力都可以呼一聲一掃而空。懷胎既時候，已經係一個任性既Mami，除左魚生外，近乎零戒口，咩都擺落口。

經歷過托唔穩，大病等等……最終都尚算順利咁帶左小瑜B黎呢個世界，正正式式地成為左個媽媽。

當初見紅陣痛入院，入到醫院先發現係假陣痛，以為醫院會踢我走，點知都照收我入院。就係咁，見紅後訓左係醫院足足4日，日日不停繼續流紅亦keep住有假陣痛，但都唔知幾時先肯出黎，灰到一個點。好在到第5日既時候，佢終於捨得出黎。由真陣痛到正式出黎個一刻，足足21個鐘。其實媽媽真係好偉大，懷胎10月期間又要驚呢樣驚個樣，初初又驚佢無心跳，之後又驚佢有唐氏，後來又要驚佢發育健唔健全，又驚陀唔穩⋯⋯

到生個陣仲要獨自面對既恐懼同痛楚，仲係超乎想像，未生小瑜B個時，習慣咩都要有planning既小瑜Mami我，一早做好哂research，有哂心理準備，知道咩時候會發生咩事，起碼唔會連開十度係咩意思都唔知。點知，當生得個時，以為自己一個都撐得住，但原來無爸B係身邊個時，真係好痛苦，從未如此掛住過爸B，咁想佢係身邊。另一半既支持真係好重要，好希望每一個爸B都會支持你既另一半，因為再強既女人都一定有軟弱既時候，我相信生仔一定係其中一項。

我好慶幸，小瑜爸B願意陪我入產房，一齊見證住小瑜出世既一刻，亦得到佢由候產室到產房既鼓勵同支持。生小朋友，絕對係要雙方一齊扶持並且慢慢地一齊走下去。愛，從來都唔係只係講出口，行動勝過千言萬語，先至係最真誠。
好好愛惜那個願意為你生小朋友既女人。

Text & Photos : 小瑜Mami

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！