【大人細路都岩玩 與動物零距離接觸 日本關西必到神戶動物王國】

今次想同大家分享一個好好玩嘅動物園～平時去動物園見到嘅動物係響個籠入面生活，旅客係需要遠距離望籠內嘅動物，但呢個動物園值得去嘅原因係園內嘅動物～除左有攻擊性或者大型動物外，其餘嘅動物都可自由走動，鳥類可以自由地飛～水豚可以四周圍行，就連袋鼠，你都可以近距離咁睇到接觸到～唔單止小朋友開心，就連大人都覺得好好玩，好過癮～

呢個動物園響神戶，個名叫《神戶動物王國》（神戶どうぶつ王国 ）

《交通》

鉄路：由神戶三宮站搭乘 Port Liner 機場線到「京コンピュータ前」駅 ( 約 14 分鐘 ) 下車即可抵達神戶動物王國～

自駕：當日我地由天王寺民宿出發前往，沿海邊高速公路行，55分鐘直達，動物園外有駐車場～500yen

〈入場費〉
成人1500yen, 3歲以下免費~

《開放時間》
留意冬季時間有所不同～

《設施》
園內分室內及室外區，睇地圖以為好細，其實入面可以玩4至5個鐘嫁～室外部份為大型動物，例如駱駝，袋鼠～而室內部份就有雀鳥，水豚等等.....

當日係星期日，一早已經排長龍入去，建議選擇平日，人較少～
地圖附時間表及門票～

入場首先見到野豬～

我地先到室外部份，見到企鵝仔，仲有草泥馬～但豆少比扭蛋波波吸引左～
但原來扭波波其實係餵食飼料~(100yen)

第一次見草泥馬同花鹿，媽媽都好開心～

另一邊有Kangaroos~再扭波波～
呢度嘅袋鼠係可以周圍自由走動～咁大隻豆仔都唔怕～

其實媽媽我都覺得好開心(雖然去澳洲都玩過）

再餵駱駝，亮點係駱鴕頭上有蝴蝶髮夾，表示係駱駝女嚟嫁～

仲有羊咩咩～

去到室內部分(地圖嘅右邊區)首先有媽媽最期待嘅水豚BB~好得意啊～豆仔話要餵佢食嘢～

另一個館有鸚鵡仔～

仲有細細隻猴子（唔知咩名）～

再去另一個館(地圖左邊)，有貓頭鷹（忘記影）仲有蓮花湖，湖內有魚仔～
兩父子餵魚仔，豆仔又好開心～

再行另一館(地圖上方)為Contact Animal～亦係豆仔至愛，因為可以親親小動物～天竺鼠，兔仔，仲有貓仔狗仔～豆仔好鐘情天竺鼠，瘋狂摸佢地～

最後我地去埋最後一個館(地圖中間)，位於動物園中心～係大型鳥類嘅區域～

行埋souvenir～完成啦～呢個動物園真係好值得推介，唔止小朋友開心，連大人都覺得好好玩，因為香港確實較小機會可以近距離接觸小動物，動物園位置方便，而且係室內，即使天氣寒冷落雨都無問題，十分適合親子遊～

<資料>
神戶動物王國（神戶どうぶつ王国 ）
地址：650-0047 神戶市中央區港島南町 7-1-9
電話：078-302-8899
網站：https://www.kobe-oukoku.com/

Text & Photos : 豆媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！