【親子好去處】洪聖古廟睇貓+坐街渡+逛海鮮市場 感受香港仔懷舊漁港風味

【親子好去處】洪聖古廟睇貓+坐街渡+逛海鮮市場 感受香港仔懷舊漁港風味

爸媽分享 bloggers
By龍鳯孖媽 on 24 Mar 2021

上次我們去了將軍澳睇吉野櫻,今次去了爸爸兒時居住的漁港睇八重櫻。(其實真係好多地方想去,但一星期先得一日可以全家郊遊。)我們搭港鐵到利東站,然後在A1出口出,過馬路直行到海濱。到達海濱後,記得要轉右行啊!向左行係去風之塔,但賞櫻之地不是在風之塔,好多人都誤會了是在鴨脷洲風之塔公園的風之塔隔離。

向右直行,經過洪聖古廟,再行前少少就會見到香港花奔展覽 2021年南區園圃,以八重櫻為主題,配以白色燈塔,其實沒有日本味,反而有點漁港特色。

每節觀賞時間為15分鐘。我們10:25a.m.才到達(之前花了些時間找位置,因有網上資料沒有詳細講清楚確實地址)。

門外有時間表顯示所排的觀賞時段,我們排緊10:40-10:55時段,等了15分鐘左右。(家長最好帶備圖書俾小朋友排隊時睇,如果冇嘢做,要小朋友企15分鐘都幾難過。)


匯報一下入場真實情況先~

21/3(日)當日的櫻花已經係水尾~

有十棵左右的櫻花樹,但只有中央幾棵係盛放,其他的都開始花落。




雖然分時段進場,但同一時段內都幾多人,而且個個集中在中央盛放果幾棵樹下影相,都好難影到靚相。(我諗除非平日或最早時段去才較少人)

所以期望唔好過高。



其實打卡主要都係滿足大家的願望。小朋友只係想玩嘅多,不斷問我幾時可以坐船。又或者如果家裡有小朋友相機,可以帶埋去,俾小朋友影吓相,冇咁悶嘛。(當日阿囝攞了我部手機影相打發時間)

滿足完大人,梗係要安排吓點先滿足到小朋友呢~

1)洪聖古廟之貓咪

隔離洪聖古廟充滿特色,亦係香港法定古蹟,可以順路去參觀吓。但小朋友對廟內的貓咪更感興趣。(提醒小朋友要愛護動物)



2)洪聖街休憩花園

有些漁船和龍舟模型供打卡,連櫈都係龍舟樣,小朋友會覺得好得意。


3)鴨脷洲海濱公園

有花有草,長廊平坦,小朋友又能跑跑放電。(唔好睇少跑,香港冇乜地方可以俾小朋友任意去跑,在學校跑,老師一定會唔俾,叫他們慢慢行。所以小朋友有得跑就已經好開心)風之塔內正進行工程,未能開放,希望將來有機會去睇吓啦~

4)鴨脷洲至香港仔街渡

廣告
廣告

小朋友見到船船已經好高興。平時搭的都係大型船,真係未試過搭這類小型船。未搭先興奮,全程非常enjoy。(好似玩咗轉樂園玩機動遊戲咁)

留意街渡分兩架:一架去香港仔中心魚市場附近;另一架去巴士總站附近。




5)海鮮市場

在香港仔街渡碼頭隔離有些海鮮市場,售賣各類乾貨和濕貨。小朋友平日好少去街市,見到魚和龍蝦等海鮮又覺得好有趣。



 

6)香港仔海濱公園

在鴨脷洲海濱公園對面就係香港仔海濱公園。小朋友除了可以狂跑外,沿路仲有富有漁港特色的雕像、畫牆和另一款龍舟,了解以前漁民的生活。另外,仲有介紹香港島南區的歷史、文化和旅遊的小白屋。由叮噹爸爸負責講解,我們好似坐了時光機返了過去了解南區歷史咁。






7)懷舊麵包店

之後叮噹爸爸繼續帶我們遊香港仔!因為他真係地膽,兒時長大的地方嘛。帶了我們去懷舊麵包店, 童年回憶返哂黎~ 光酥餅 、 椰堆仔 、 摩囉酥和香蕉糕等,真係好耐冇食過~依家好少地方仲賣緊傳統鄉土小食。孖寶從未食過,食完覺得好滋味啊~


8)香港仔天后古廟

古廟係三級歷史建築,由漁民集資於清朝咸豐元年(1851年)建成,係香港開埠後較早建成嘅中式廟宇。內裡保存了不少清朝文物,包括鑄於咸豐元年(1857)的古鐘。

最後叮噹爸爸帶我們行埋佢以前的舊居和幼稚園與小學,我們就完成了時光旅程。


後記:

1.櫻花樹的數目算多,可惜已過盛放期。而且人好多,想盡情咁影相打卡似乎有點困難。

2.小朋友對於咁多人的打卡點沒太大興趣,所以千祈唔好只去打卡,順路跟住玩,小朋友應該都會玩得開心。

3.我們沒有去食傳統艇仔粉,因帶住小朋友不太方便。所以我們在鴨脷洲一間台式食店食午餐。食物和飲品味道十分之好,而且價錢平民化。

4.如果小朋友年幼,要坐bb車,其實都適合去今次的行程。之前搭船都見到有媽媽帶bb車上船。只係要多一個人幫手抬bb車上船,另一人就抱住bb。

5.另外,香港仔地域多馬路,而且行人路窄,小心看顧小朋友。推bb車就不太適合行入城市,可能留在海濱公園玩會較好。

Text & Photo : 龍鳯孖媽

🤱🏻 追蹤我們的 Instagram mamidaily.hk 看更多育兒教育資訊
Share to Facebook