【喬喬妹妹養育記0M】坐月食咩餸？分享我嘅媽咪愛心坐月餐

講開坐月餐大家都會覺得好麻煩，如果同屋企人食又唔知洗唔洗分開食，又唔知點煮點搞。我兩胎都係媽咪幫手坐月，煮坐月餐畀我食，除咗坐月湯水之外，基本上我哋都係一齊食嘢㗎，喺度都想分享以下我幾晚坐月餐畀大家睇下！

我嘅坐月餐，每晚大概有兩碟餸，另外加一碟菜或者魚。餸方面多數會有豬肉，肉類同魚類就補充蛋白質，菜就增加膳食纖維（幫助排便，好多產後媽咪都有便秘問題，特別係餵人奶又飲得唔夠水多嘅媽咪）。

調味方面主要少油少鹽少糖為主，其實我媽咪平時煮嘢都係一樣，所以大家唔需要因為調味唔同要分開食飯。

湯水方面，我第一胎飲得比較多上奶湯水，而今胎就飲平補湯水多，因為第一胎餵人奶好順利，所以今胎都唔需要太上奶，我今胎試過簡單飲啲平補湯水都出現谷奶谷到劇痛情況，所以我完全唔敢飲好多上奶湯；所以建議大家要就返自己情況去選擇飲咩湯水或者食咩上奶食材。

其他食材方面，我知好多月子餐公司都會提供糖水，例如好似芝麻糊或者杏仁糊嗰類，不過我自己喺屋企就冇準備依啲食，大家都可以睇返自己想唔想食去安排啦！

Text & Photo : Kylife