父母最大心願就係 仔女做個有品德嘅人

做咗父母先明白，無論佢做咩職業、搵唔搵到錢都唔重要，只希望小朋友可以做個善良嘅人。喺呢個咁現實嘅世界，能夠保持最單純嘅心真係好困難，因此爸爸媽媽最好喺佢哋細個嘅時候開始教導佢哋行出一條善良純真嘅路。

Photo from MamiDaily

1. 減少講「快啲講多謝啦！」
父母唔好一味只叫小朋友同其他人講唔該、多謝、對唔住，小朋友有機會只係未開聲講又或者只係怕醜唔敢出聲。當佢哋被逼又或者感覺好似做咩都被監視嘅時候，佢哋可能會偏偏唱反調，係唔講出聲！父母應出門前提醒佢哋，如果當日佢哋依然冇講的話，返到屋企再慢慢話佢哋知呢件事嘅重要性。

2. 身教
身教真係好重要！當每日都叫小朋友向其他人講多謝時，爸爸媽媽有冇諗過自己都需要多謝仔女呢？好多時其實小朋友都係配合緊大人嘅生活作息，父母不妨由自己做起，親自表達如何做個有品德同有家教嘅人！

Photo from MamiDaily

3. 正能量
好多時爸爸媽媽都會問小朋友「返學遇到咩困難啊？」、「今日有冇唔開心啊？」等消極性問題，呢啲事情當然要關心一下！不過同時都要問吓佢哋有啲咩開心嘅事情發生，多作一啲正向性溝通，等佢哋每日都會諗起感恩嘅事情！

4. 學懂原諒
當其他人做咗啲唔好嘅事，令自己唔開心時，要教識小朋友點樣原諒別人。人仔細細其實未必知道原諒真正嘅意思，爸爸媽媽可以同佢哋解釋當人哋同自己道歉後，可以選擇原諒或唔原諒對方。真正嘅原諒係聽完句「對唔住」後，將呢件事徹底忘記而非繼續放喺心入面。

Photo from MamiDaily

Text：Mami Editorial