減輕家庭育兒壓力爸爸絕對係「良藥」

By race.cheng on 26 Aug 2019

喺育兒依條難巨又漫長嘅路上，單靠媽媽自己嘅努力係唔夠，如果老公可以化身成「神隊友」，咁樣喺照顧小朋友同媽媽身心理上都絕對可以幫輕唔少！所以，爸爸喺屋企育兒嘅工作係不可或缺！

養和醫院病理學專科醫生媽媽許嫣，喺著作《醫生媽媽的時間管理術》分享咗唔少自家生活育兒例子～其中提到自己可以工作同育兒上都兼顧有加嘅原因就係得到另一半神助功，仲教大家點說服老公願意擔起湊B嘅工作呢～

Photo from mamiDaily

1）父子關係親密小朋友較少有行為問題

許醫生分享咗唔少實際報告去說服隊友們，提出有英國研究報告指，父子關係疏遠、缺少溝通，會令BB1歲時出現顯著行為問題，建議BB時期開始，爸爸就要開始同BB有互動！另外仲有牛津大學、倫敦國王學院、倫敦帝國學院聯合發表報告稱，BB出生後幾個月內如果多同爸爸互動，到2歲後嘅認知能力同智力，比冇同爸爸互動嘅優秀！

2）爸爸願意參與對小朋友成長更深遠

書中亦提出，有爸爸支持嘅小朋友，特別喺有爸爸支持同信任嘅囡囡，自尊心發展健康，擁有較好自我形象，甚至喺學校會有出色表現，同工作上有較高經濟收入。

3）湊B 對爸爸都好

講咗咁多好處，好似都係講對BB有咩好，咁樣點可以徹徹底底說服到爸爸？所以許醫生都提到唔少研究指出，有參與照顧小朋友嘅爸爸，身心上都比其他爸爸健康！其中美國賓州州立大學人類發展與社會學研究發現，奶爸們喺社交生活、家人關係同工作態度都比一般男士正面。另外美國國家科學學院嘅研究都指出，男士會花時間去湊B係可以活化腦部負責處理情緒、對危險嘅警覺性同獎賞鼓勵嘅區域！