寶寶缺水5種警號要注意！

BB未識講嘢，唔舒服嘅話都剩係識喊，要媽媽慢慢檢查先知咩事！水真係好重要，佢用嚟維持身體運作，仲係輸送養份、促進新陳代謝嘅好幫手，有利孩子發育成長。所以BB身體一缺水就好大件事，父母要時刻留意住以下5個特徵同埋參考3個注意事項啊～

Photo from MamiDaily

寶寶缺水特徵

1. 嘴唇甩皮
如果BB經常舔嘴唇，家長就要多多留意啦！因為好多時都係因為佢哋口乾引致佢下意識做呢個小動作，如果嚴重到嘴唇甩皮嘅話，就一定要小心，餵完佢飲水後一段日子都冇改善，就要去睇醫生啦！

2. 小便次數減少
正常嚟講，BB每日最少要用6條尿片；另外亦可留意小便嘅顏色，如果係淡黃色嘅話，代表佢身體嘅水份充足，反之如果係深黃色嘅就要留意啦，爸爸媽媽喺適當嘅時候要幫佢補充水份。

Photo from MamiDaily

3. 經常出汗
BB出汗出得多，代表佢哋身體嘅水份一直流失緊，因此佢哋對水嘅需求更大！

4. 皮膚乾燥
BB皮膚白滑又有光澤，一旦身體缺水，皮膚嘅轉變就好明顯，非常容易乾燥。

Photo from MamiDaily

5. 哭泣時沒有眼淚
小朋友經常哭鬧，當佢哋不停喊緊表達不滿時，只有聲音而冇或好少眼淚嘅話，分分鐘就係佢要飲水嘅警號！

注意事項

1. 幾時需要飲水呢？
未足6個月大嘅BB一般飲用母乳或奶粉嘅話，就已經有足夠水份；而6個月或以上嘅BB就可以根據佢嘅狀況、需要補充水份！

2. 食飯、瞓覺前盡量唔好飲水
BB嘅胃容量比較細，餐前飲得太多水嘅話，會影響食慾。瞓覺前最好都唔好餵BB飲太多水，唔係一定會影響佢哋嘅睡眠質素！

Photo from MamiDaily

3. 口渴時 絕對唔可以灌水
BB缺水的話，大人千祈唔好一次過畀好多好多水佢飲，對佢哋嘅腸胃絕對有好大嘅傷害！家長應該逐少逐少咁餵畀佢哋～

註：寶寶嘅身體情況不一，以上資訊未必適用於所有BB，如有任個疑問，最好盡快問醫生嘅專業意見。

Text：Mami Editorial