一日一雞蛋 BB遠離發育不良！

做媽媽最驚就係小朋友食唔飽，導致營養唔夠，發育不良！見到小朋友食嘢就最開心～ 雖然佢哋肯食嘢已經好好，不過其實食啲咩都好重要㗎！近日一項研究指出，BB一日食一隻雞蛋可以降低發育遲緩嘅風險。

Photo from MamiDaily

一項由位於美國聖路易斯嘅華盛頓大學負責嘅研究，邀請咗163個來自南美洲厄瓜多爾嘅6至9個月大嘅BB參加一項隨機對照試驗，從而搵出每日增加雞蛋攝取量，對佢哋發育嘅影響！研究人員將佢哋分成兩組，一組每日餵食雞蛋一隻，而另一組則唔餵雞蛋，而實驗時間為6個月！

Photo from MamiDaily

厄瓜多爾當地有42%兒童有發育遲緩問題，喺今次嘅結果顯示，每日食一隻雞蛋嘅BB發育遲緩嘅機率降低咗47％；雞蛋更有效維持佢哋嘅體重，體重減輕嘅可能性大大減低咗74%！而研究報告嘅指出，食咗雞蛋嘅小朋友，對想食含糖食物嘅意欲減低，即代表雞蛋可以令人獲風飽肚感，並減低吸收卡路里嘅渴望。

Photo from MamiDaily

負責此研究嘅Lora Iannotti表示，雞蛋同人類嘅發展有莫大嘅關連。每日餵BB食雞蛋，唔止幫助佢哋成長，仲可以避免肥胖問題，加上雞蛋價錢唔太貴又容易買到，絕對啱晒小朋友吸收營養，發育長高高！

唔同小朋友嘅體質、身體情況都有分別，以上資訊未必適用於所有人，更加唔適合對雞蛋過敏嘅小朋友！對飲食營養、過敏情況有任何疑問，請向醫生查詢。

Text：Mami Editorial