![專家解密:BB唔鍾意草嘅真相!](https://image.mamidaily.com/wp-content/uploads/2019/08/%E7%A0%94%E7%A9%B6%EF%BC%9A%E5%B0%8F%E6%9C%8B%E5%8F%8B%E6%80%95%E8%8D%89%E5%9C%B0-%E5%8E%9F%E4%BE%86%E4%BF%82%E5%A4%A9%E7%94%9F%EF%BC%9F-OG.jpg?auto=format&w=718)
專家解密:BB唔鍾意草嘅真相!
平時帶小朋友出街玩,去到邊都跳跳紮好開心~ 唯獨係去到有草或者有沙嘅地方,就喊過不停,仲抱到爸爸媽媽實一實唔肯落地玩!父母以為BB幼嫩的肌膚被草地拮到唔舒服?原來事實唔係咁,仲要追溯返去遠古時代㖭⋯⋯
Photo from MamiDaily
呢一項研究由美國耶魯大學嬰兒認知中心負責,佢哋邀請咗一啲媽媽帶同寶寶參加實驗,研究人員將植物、人造植物同埋普通死物放喺BB面前,而實驗房間入面冇其他物品或聲音吸引佢注意。另外,研究人員亦同媽媽做咗問卷調查,收集一啲同小朋友接觸植物嘅次數、佢哋幾耐會見到大人處理植物等呢啲情況。
研究報告首先指出,BB怕驚植物原來係人類嘅天性!原因係喺幾千年前嘅世界,除咗人類外,主要就剩係等泥土同植物,而喺呢兩樣當中仲有唔少隱藏毒性嘅事物!因此小朋友天生就有種自我保護機制,將佢哋自以為有危險嘅事物排走!難怪佢哋次次掂到草地都咁驚驚⋯⋯
Photo from MamiDaily
喺實驗結果亦可得知,小朋友伸手觸摸植物或人造植物比起拎起其他物件嘅平均時間多出5秒。佢哋喺掂呢啲植物前,會顯得比較猶疑,研究人員解釋可能佢哋期望遲啲掂到佢哋,等爸爸媽媽有時間「救」佢哋!
研究人員同時亦指出,原來小朋友親眼見到父母處理植物嘅話,會導致佢哋唔敢接觸佢哋。研究報告表示,或者呢個結果間接解釋點解叫小朋友食蔬菜係咁困難嘅一件事!唔止因為佢哋唔鍾意蔬菜嘅味道,原來係佢哋開啟嘅自我保護機制防止佢哋被有毒植物入侵!
Photo from MamiDaily
不過當BB佢哋清楚咁了解到草地、植物同或者蔬菜係安全唔會傷害到自己嘅時候,加埋父母嘅引導下,佢哋就會慢慢接受草地~唔會再捉實爸爸媽媽唔敢落地玩了!
Text:Mami Editorial