研究：爸爸媽媽不自覺偏心都唔知？

當你有兩個仔女或以上，有人問你會唔會偏心其中一個㗎？爸爸媽媽就緊係唔會承認，仲會話：全部都係親生嘅，點會剩係錫一個唔錫另一個呢？不過近日一個研究就指證父母「口裡說不，身體卻很誠實」，從你嘅消費習慣就睇得出究竟父母分別偏心仔定女！

Photo from MamiDaily

呢項由美國羅格斯大學商學院負責，佢哋為咗免除文化背景不同。分別搵咗分別來自美國同印度唔同家庭參與實驗。研究人員話畀佢哋知，佢哋將會獲得$25美元嘅國債券，問佢哋究竟會將呢啲錢交畀囝囝定囡囡呢！

結果發現，大多父母都係會偏向同自己一樣性別嘅小朋友，75%嘅媽媽會揀囡囡；87%嘅爸爸就會揀囝囝！研究人員表示，父母揀返同性嘅子女，原因係佢哋認為喺佢哋身上見到自己嘅影子，感覺同性嘅子女同自己更有關聯，但係呢個只係父母無意間嘅決定。

Photo from MamiDaily

負責研究嘅營銷學教授Kristina Durante指出，屋企邊個手握財政大權嘅人決定家庭支出，對小朋友有絕對嘅影響！如果係由媽媽決定點用錢嘅話，比起囝囝，喺醫療保健、繼承財產等方面，女兒或者可以獲得更多資源！相反，如果係爸爸決定嘅話，長遠嚟講囝囝就更大機會受益啦！

Photo from MamiDaily

教授強調呢種「偏心」係父母冇意識嘅偏見，不過正正就係因為咁，對家庭同小朋友嘅影響更深遠！各位爸爸媽媽真係要多加注意自己喺日常生活中有冇不自覺地偏幫其中一個仔女啦，如果有嘅話一定要及時作出改變。

Text：Mami Editorial