媽媽餵哺母乳 4大飲食迷思

好多媽媽生完BB後，都會選擇餵哺母乳。不過作為新手媽媽，唔止擔心BB食得飽唔飽，仲會特別注意自己嘅飲食習慣，究竟要唔要戒口或進補之類，今次就為大家解答一下有關哺乳期間嘅飲食迷思。

Photo from MamiDaily

1. 哺乳期間要不要戒口？

食：

餵母乳嘅媽媽，最重要係有均衡飲食。除非媽媽或BB對某啲食物過敏，否則一般嚟講，都係唔使刻意戒口。若懷疑BB對你食嘅食物有過敏反應，應諮詢醫生意見。另外，有啲BB亦會因為媽媽食得太多濃烈味道、容易產生體味嘅食物，如洋蔥、咖喱、辛辣類等，會產生不適而哭鬧。如果有呢啲情況，媽媽可少食呢類食物。

Photo from MamiDaily

飲：

餵母乳嘅媽媽需限制飲用含咖啡因嘅飲品，如咖啡、濃茶或某啲汽水等。如果真係要飲咖啡或奶茶，可考慮飲不含咖啡因，以減少BB因中樞神經系統受咖啡因刺激，而難於入睡。另外，酒精亦有損健康且有礙判斷，哺乳期間喝酒亦可能會減少乳汁製造及影響BB發育，所以建議媽媽唔好飲用含酒精嘅飲品。

Photo from MamiDaily

2. 哺乳期間可不可以進補？

進補的若果係食材，一般唔會影響餵哺母乳。但若果係中藥，建議先請教中醫。

3. 係咪要食多啲嘢增加奶量？

只要BB吸吮正確，並且按BB需要餵哺，媽媽嘅奶量自然就能夠滿足佢嘅需求。哺乳媽媽每日只需要從食物攝取額外500千卡熱量以製造母乳。

Photo from MamiDaily

4. 食啲咩對餵哺母乳有幫助？

- 選全穀類食物，多食蔬菜、水果
- 略增加肉、魚、蛋類嘅分量，多選含奧米加-3脂肪酸較多，而甲基汞（汞即水銀）含量低嘅魚類
- 多選碘質豐富嘅海產，間中進食海帶
- 注意攝取鈣質豐富的食物

Text：Mami Editorial