支出愈嚟愈大？ 爸爸媽媽必睇6個慳錢大法

自從有咗BB後，要用嘅錢愈嚟愈多！未生之前，有啲花費好似產檢、增設家俱、BB用品等係一定要用；生咗之後，亦有好多嘢要購入以助照顧小朋友，可以話佢哋愈大個，用嘅錢愈多，爸爸媽媽嘅銀行戶口數字日日跌緊⋯ 不過唔緊要， 即刻睇吓以下6個慳錢攻略幫唔幫到手！

Photo from MamiDaily

1. 買嘢時停一停
唔知點解童裝真係特別吸引！小朋友嘅衫褲鞋襪靚過大人嘅好多，父母好多時望到覺得得意、可愛都想即刻畀錢。不過大家買嘢之前，不妨停一停、諗一諗，因為小朋友大好快，唔止衣物好快唔啱著，玩具亦都好快唔啱玩。所以畀錢之前，諗清楚係咪真係有需要！

2. 善用社交平台
小朋友嘅嘢好快唔啱用，好多家長都會將一啲唔再用得著嘅二手物件放出嚟畀有需要嘅人。如果家長覺得貼身衣物唔太衛生，可以揀一啲物件，好似BB車、BB床等等，絕對可以慳唔少！

Photo from MamiDaily

3. 玩具圖書館
香港有好多唔同嘅免費資源畀小朋友用，好似玩具圖書館咁。入面有好多唔同種類嘅玩具，家長可以有小朋友出去玩，又唔使買入大量玩具囤積喺屋企，一舉兩得。

4. 留意唔同優惠
做對精明父團，點少得留意唔同優惠呢？除咗超級市場有咩抵買，亦可以多留意網絡商店不定時提供嘅折扣，又或者將有需要用嘅物品mark低，到有大型展覽，例如BB展、美食展等一次過以優惠價購入！

Photo from MamiDaily

5. 少出街吃飯
出街食飯嘅價錢，同留喺屋企自己煮比較，真係好貴好多。所以冇咩特別日子要慶祝，留喺屋企食飯一定最慳錢，而且又唔使食味精，夠晒健康啦！

6. 免費好去處
雖然坊間有好多親子餐廳、遊樂場等嘅親子好去處，不過就要收入場費或者要消費小朋友先可以玩。其實香港都有好多免費嘅地方可以畀爸爸媽媽同小朋友一齊享受親子時光，好似沙灘、郊野公園、泳池等，一樣可以放足電！

Photo from MamiDaily

Text：Mami Editorial