嗌一句影響一世！父母大聲斥責小朋友只得壞處

相信各位家長湊住小朋友都知道佢哋真係愈大愈曳，有時睇少一眼都發生災難，輕則倒瀉嘢，重則整傷自己。爸爸媽媽湊住仔女每分每秒都處於就快爆炸狀態，每逢佢哋闖禍都忍唔住大爆發大聲指責佢哋。唔好以為鬧多幾次小朋友就唔會驚，其實對佢哋心理同生理都一樣唔好。即刻睇吓有咩壞處同埋家長可以點改善啦！

Photo from MamiDaily

【3大壞處】

1. 自尊心受挫
父母嘅說話對佢哋嘅未來發展有好大嘅影響，被大聲責罵嘅小朋友，一方面認為得唔到父母嘅認同，另一方面亦會造成自尊心受挫，對佢哋嘅學業、社交等有直接且長遠嘅影響。

2. 親子關係破裂
每次父母大吼大叫或向佢哋表達憤怒，都好容易嚇親小朋友，令人不安。呢種具攻擊性嘅表達方式不但被稱為情感虐待，父母同孩子嘅關係亦好大機會因而破裂。當仔女唔再相信父母，或者唔想再同父母溝通，只會引來其他更激烈嘅打罵。

Photo from MamiDaily

3. 影響大腦發展
有研究表示曾慘受父母語言暴力嘅青年人語言理解能力比一般人差，原因係佢哋身體負責語言嘅兩個部份，韋尼克區同前額葉之間嘅連接區域減少。正在發育嘅小朋友，神經系統仲未完善，當聽到父母大聲責罵或對佢哋發脾氣，令孩子心情變得繃緊，腦部結構發展或會受到影響。

【4個改善方法】

1. 學習管理情緒
做家長所有事情都係一邊做一邊學，而情緒管理係做一對成功父母嘅重要因素。照顧小朋友時，唔可以隨使發脾氣、大聲責罵佢哋。絕對要喺情緒爆發前先發制人，嗌出聲前，畀一分鐘自己冷靜落嚟。冷靜慢慢處理曳曳小朋友，對家長同仔女一定係利多於弊。

Photo from MamiDaily

2. 解釋後果而非威脅
大聲講嘢時，小朋友嘅耳仔會自動閂埋，無論你講啲咩，佢哋都唔會聽得入耳，何況大聲鬧人時嘅表情仲要好激動同憤怒？家長應該同小朋友解釋佢哋做呢件事嘅後果，例如佢哋喺晚飯時間唔肯食飯，父母唔應該大嗌同強逼佢哋食飯，反而應該同佢哋講如果依家唔食飯嘅話，一陣就冇得食會肚餓，如果佢哋覺得呢個結果可以接受就由佢哋，因為係佢哋嘅選擇。

3. 唔好咩都反對
每次小朋友要求一啲嘢嘅時候，好似買玩具、去街玩或者買零食咁，家長下意識都係會即刻反對。不過家長其實唔好咩都say no，反而細心聆聽孩子嘅意見，盡量同佢哋商量。如果咩都唔批准的話，反而激起佢哋內心嘅反叛種子，到時家長可能仲激氣！

Photo from MamiDaily

4. 向孩子道歉
若果父母當下真係忍唔住發火，事後必須要同小朋友道歉。一來可以教佢哋大人做錯事都要認錯講對唔住，做個好榜樣。二來亦可表示父母對佢哋嘅尊重，並引導佢哋較正確嘅做法。

Text：Mami Editorial