唔想小朋友中招「冷氣病」 預防工夫要做足

夏天熱辣辣，唔止出街要行商場、飲凍飲，連喺屋企都要長期開冷氣吹住，一滴汗都唔想流！長期涼住冷氣對大人都唔好啦，何況係抵抗力較弱嘅小朋友呢？

Photo from MamiDaily

「冷氣病」其實唔係真係一種病，而係都市人經常留喺室內歎冷氣而得嘅症狀，包括：頭痛、口乾、鼻敏感、氣喘等等。唔想小朋友年紀輕輕就有「冷氣病」，家長要注意以下5點啊！

1. 空內溫度
天氣太熱，真係好難唔開冷氣。不過家長喺屋企開冷氣時，盡量將溫度調較至23-25度，最好同室外嘅溫差唔好超過5度。另外，就算太熱都唔好將溫度一下子較到好低，避免身體唔適應而患病。

Photo from MamiDaily

2. 出風口方向
家長開冷氣時要望清楚出風口嘅方向會唔會直接吹住小朋友，特別係要小心唔好吹到個頭同埋肚仔。最好將扇葉調較向上，避免冷風直接入人體。

3. 定期清洗
就算每日都使用冷氣，都會有好多塵積聚喺隔塵網。家長長期開冷氣嘅話，一定要勤力啲清洗，最好每兩個星期清潔一次隔塵網，減少屋內致敏源及防止病菌繁殖。

Photo from MamiDaily

4. 注意保溫
帶小朋友出街最好帶定件外套或被仔，玩到出晒汗即刻入冷氣地方絕對唔係好事，加上餐廳同商場嘅冷氣一般都開會到好大，亦未能自行調較。氣溫太低都有外套畀小朋友著，咁就唔怕凍親啦！

5. 保持空氣流通
夏天雖然好熱，不過長期開冷氣對身體唔好，電費又費，連冷氣機可能會壞得快啲。家長可以考慮喺瞓覺以外啲時間，將門窗打開，等新鮮空氣入屋，仲可以減低細菌困住喺室內嘅危機。

Photo from MamiDaily

Text：Mami Editorial