【注意】6種兒童玩具 潛在危機！

意外雖然唔可能完全避免，但係可以預防。平時畀小朋友玩嘅玩具，有啲其實可能暗藏住危機，而家長又未有留意，好容易就會發生意外。以下幾款玩具，買之前一定要加倍注意！

1. 塑膠鴨

好多家長都會買呢款小黃鴨，放喺水中陪小朋友一齊沖涼。呢啲小黃鴨唔單止容易滋生細菌，仲有機會損害健康，導致兒童性早熟。當小黃鴨遇到熱水或沐浴液等油性物質時，好容易會釋出塑化劑。若小朋友放入口咬，更會嚴重損害健康。

Photo from MamiDaily

2. 氣球

色彩繽紛、印上圖案嘅氣球受得小朋友歡迎。睇落冇乜攻擊性，但其實殺傷力可以好大，甚至足以致命。過往曾經有多宗氣球意外，氣球突然爆破，碎片直插喉嚨，導致窒息。

Photo from shutterstock

3. 水槍

一到夏天，好多家長都會帶小朋友去沙灘嬉水，大人細路都鐘意拎住支水槍四圍射。唔好睇少水槍嘅威力，射中眼分分鐘會盲！曾有測試顯示，水槍噴出嘅水柱，可以將5張A4紙瞬間射穿，殺傷力極大。

4. 絨毛公仔

放喺小朋友床上，陪佢哋瞓覺嘅絨毛公仔，都存在危險。絨毛公仔可能會引起呼吸問題，而小朋友喺瞓覺嘅時候，若唔小心被絨毛公仔壓住，更可能會導致猝死。

5. 電池玩具

好多玩具都需要用電池，小朋友可能會自行拆下電池，放入口中，唔小心吞咗落肚。而電池隨住食道蠕動，持續放電，好容易會導致灼傷，令食道及胃部受傷。

Photo from Mamidaily

Photo from MamiDaily

6. 指尖陀螺

呢款指尖陀螺，曾風靡一時，大人細路都拎住一個，轉下轉下，睇落都幾治癒。不過，美國就將呢個指尖陀螺列為危險玩具。原因係當指尖陀螺拆解後，有好多細小零件，小朋友容易誤食。另外，亦有研究指出，指尖陀螺會分散小朋友注意力，影響學習。

Text：Mami Editorial