冇覺好瞓！女性一年瞓少近46日 原來係老公影響

成日話做咗媽媽後，睡眠時間少之又少。除咗擔心小朋友夜晚瞓得唔好囉囉攣外，近日有研究指女性睡眠質素變差，最大嘅原因係同另一半有關！難怪生咗BB之後，晚晚都冇覺好瞓，愈嚟愈醒瞓原來老公先係罪魁禍首。

Photo from MamiDaily

呢項研究由英國家具公司Bensons for Beds負責，佢哋嘅研究人員訪問咗2,000對夫婦，主要針對佢哋嘅睡眠習慣。研究發現，有三份一嘅受訪女性都會被唔同嘅外來因素影響，搞到晚晚都會起身；有一半嘅女性表示佢哋經常瞓唔著覺，反之只有五份一嘅男士認為睡眠經常被打斷。

Photo from MamiDaily

結果亦顯示，女性平均每晚都會瞓少3個鐘，即係一年就已經少咗1,095個鐘，差唔多46日啊！有14%嘅女受訪者認為照顧小朋友會影響嘅睡眠，經痛亦係影響女士瞓覺嘅三大原因之一。而最大影響嘅係另一半嘅鼻鼾聲！老公嘅鼻鼾聲真係好大困擾，時大時細，仲要唔知幾時出現嗰吓最慘。

Photo from MamiDaily

如果睡眠不足嘅話，短期內會導致注意力不集中、煩躁不安同埋情緒低落，影響判斷力。長遠嚟講，長期缺乏睡眠嚴重影響健康，唔止成日冇精神，仲有機會引起肥胖、第2型糖尿病、心臟病等疾病。

Text：Mami Editorial