新界區兒童遊戲室

炎炎夏日，帶小朋友放電都唔可以下下出室外玩，室內商場又唔係有好多地方適合小朋友去。但原來康文署喺市區及新界都有提供兒童遊戲室！唔好以為政府嘢實好舊，有唔少兒童遊戲室仲要好靚又大，絕對夠小朋友玩足一日呀，即刻睇下有邊度好玩～

新界區兒童遊戲室

**荃灣區**

1.荃灣體育館

依個體育館係上年18年先開幕，所以遊戲室亦相當之新，雖然面積只有220平方米，但入到去相當寬闊，同平時有3百幾平方米嘅遊戲室不相伯仲，遊戲設施亦相當新穎，有雙層攀爬架迷宮、機關同滑梯，而且場內有分區，大細B都可以玩！

Photo from Alfred成長日記

地址：新界荃灣永順街53號
保養日：每月第一及第三個星期四上午7時至下午1時
開放時間：由早上8：30開始至夜晚9：15，每節45分鐘，每節清潔10分鐘再開始下一節

**葵青區**

1. 青衣西南體育館

依個係接近最大嘅遊戲室，有350平方米，而且小編相當喜歡佢夠光猛，夠自然光，而遊戲設備就較多大型設備，畀小朋友爬走一流！

地址：新界青衣涌美路70號
保養日：每月第一及第三個星期一上午7時至下午1時
開放時間：由早上9：00開始至夜晚9：45，每節45分鐘，每節清潔15分鐘再開始下一節

**西頁區**

1. 香港單車館

依個館主要係玩極限運動，而入面嘅遊戲室亦跟隨以極限為主題，有好多唔同類型賽車設備，而且館外亦有公園，可以兩邊玩！

地址：將軍澳寶康路105-107號
保養日：每月第一及第三個星期二上午7時至下午1時
開放時間：由早上9：00開始至夜晚9：30，每節45分鐘，每節清潔15分鐘再開始下一節

2. 坑口體育館

坑口兒童遊戲室以奇妙水世界為題，有唔少魚類型設備，而且更設有靜態閱讀區閱讀布藝兒童故事書，唔係只得跑跑跳跳！

地址：將軍澳培成路38號 西貢將軍澳政府綜合 大樓1樓
保養日：每月第二及第四個星期二上午7時至下午1時
開放時間：由早上9：00開始至夜晚9：30，每節45分鐘，每節清潔15分鐘再開始下一節

3.調景嶺體育館

以海洋世界為主題嘅調景嶺體育館遊戲室，最吸引小朋友就係一艘有潛望鏡嘅大潛艇同搖搖我海馬，當中仲有唔少Cushion滑梯！

地址：將軍澳翠嶺路2號
保養日：每月第二及第四個星期一上午7時至下午1時
開放時間：由早上9：00開始至夜晚9：30，每節45分鐘，每節清潔15分鐘再開始下一節

***元朗區***

1.屏山天水圍體育館
四周較多軟墊，連牆嘅軟墊都較高，但玩具或遊戲設施較少，對大B嚟講可能較悶，只有一個攀爬架，有BB版滑梯，對於細B就應該好夠玩，而且四周護墊多，玩具設施分散唔多，方便爬嚟爬去！

地址：天水圍聚星路1號
保養日：每月第一及第三個星期三上午7時至下午1時
開放時間：由早上8：30開始至夜晚9：20，每節45分鐘，每節清潔15分鐘再開始下一節

2. 天瑞體育館
依個遊戲室較細，只有110米平方，全場以濕地為主題，綠悠悠嘅環境，唔會令到四周好逼，但設施就真係好少，應該玩唔耐。

地址：新界元朗天水圍天瑞路七號
保養日：每月第二及第四個星期二上午7時至下午1時
開放時間：由早上8：00開始至夜晚8：00，每節25分鐘，每節清潔10分鐘再開始下一節

3.天暉路體育館
依間遊戲室可算係全港第2大，有315平方米，主題係海洋世界，有大滑梯、仲有哈哈鏡，雖然係2012年啟用，但設施仍然新淨，適合大細B嘅設施都有，而且地方夠大，唔擔心易碰撞到～

地址：新界天水圍天瑞路63號
保養日：每月第二及第四個星期三上午7時至下午1時
開放時間：由早上8：30開始至夜晚9：20，每節50分鐘，每節清潔10分鐘再開始下一節

4.元朗體育館

依個係新界西小朋友等咗好耐嘅遊戲室，係17年6月先啟用，依個遊戲室比一般遊戲室特別，設有好多感官設施，而且以糖果屋為主題，設備可愛，拎嚟打卡都好靚！同埋如果係大B，爸媽可以係出面玻璃室睇住，唔洗入埋，咁就唔怕逼爆喇！

地址：元朗馬田路52號元朗文化康樂大樓3樓
保養日：每月第二及第四個星期二上午7時至下午1時
開放時間：由早上8：30開始至夜晚9：20，每節50分鐘，每節清潔10分鐘再開始下一節

**沙田區**

1.馬鞍山體育館

以礦洞為主題，男BB可能會較鍾意，遊戲室只有130平方米，設備都較少，但勝在坐位較多，爸媽公婆都唔洗擔心冇位坐～

地址：新界沙田馬鞍山鞍駿街14 號
保養日：每月第一及第三個星期一上午7時至下午1時
開放時間：由早上8：00開始至夜晚9：50，每節25分鐘，每2節清潔10分鐘再開始下一節

2.圓洲角體育館

依個遊戲室好大，有324平方米，而且有分區，有小屋區，啱年紀較小嘅細B，而出面冒險區亦有好多設備，有小樹屋同探險船，比小朋友任玩，設備都新穎同夠多！

地址：新界沙田銀城街35號
保養日：每月第一及第三個星期四上午7時至下午1時
開放時間：由早上8：00開始至夜晚9：50，每節25分鐘，每2節清潔10分鐘再開始下一節

**大埔區**

1.大埔墟體育館
依度嘅遊戲室都算大，係大埔唯一嘅遊戲室！依間遊戲室時不時就有新設備玩，但冷氣就真係比較凍，去到記得要有帶褸！另外，因為依個遊戲室係大埔新街市上，2樓熟食中心多有好多出名餐廳，爸媽可以一站式做齊吃喝玩樂做齊晒！

地址：新界大埔鄉事會街8號 大埔綜合大樓6樓
保養日：每月第一及第三個星期一上午7時至下午1時
開放時間：由早上8：00開始至夜晚9：00，每節50分鐘，每節清潔10分鐘再開始下一節

**北區**

1.聯和墟體育館

依個遊戲設施同設備都較簡陋，只有普通搖搖椅，而且唔係全場都鋪滿軟墊，爸媽都要企係到看實小朋友。

地址：新界粉嶺聯和墟和滿街9號3樓
保養日：每月第一及第三個星期一上午7時至下午1時
開放時間：由早上8：00開始至夜晚9：50，每節50分鐘，每節清潔10分鐘再開始下一節

2.保榮路體育館

依個遊戲室係全港第一大，面積有328平方米，以太空為主題，整個遊戲室都有攀爬架圍住，大B可以爬足一日，而且有其他較細小嘅設施，細B唔想爬架都有得玩，但係由於冇明確分區，只係一個設備就放在一個位置，可能小朋友跑跑跳跳，可以能容易碰撞。

地址：新界上水百和路19號
保養日：每月第二及第四個星期一上午7時至下午1時
開放時間：由早上8：30開始至夜晚10：00，每節45分鐘，每節清潔15分鐘再開始下一節

**離島區**

1.長洲體育館

對於長洲或者去開長洲嘅小朋友嚟講，依個遊戲室就係一個室內公園，但環境較細，只有124.8平方米。

地址：長洲醫院路三號
保養日：每月第一及第三個星期一上午7時至下午1時
開放時間：由早上7：50開始至夜晚09：40，每節50分鐘，每節清潔10分鐘再開始下一節

2.東涌文東路體育館

離島區嘅遊戲室一般較細，而東涌依個遊戲室就只有145.4平方米，但勝在人唔多，設備夠大，而且乾淨安全。

地址：新界東涌文東路39號東涌巿政大樓二樓
保養日：每月第一及第三個星期一上午7時至下午1時
開放時間：由早上8：00開始至夜晚09：30，每節時間都只少有1小時，下午時節會較長，每節清潔只少有30分鐘再開始下一節

Text：mamiDaily
Sources：康文署