生B前嘅幻想同生B後嘅現實生活 有幾大分別？

結咗婚後，兩公婆瞓覺之前總會傾幾句先慢慢入睡，大家或多或少都會一齊討論生BB後嘅生活。兩個人總會期待BB加入成為一家三口，不過想像總是美好的！生咗小朋友先會明白，生之前嘅幻想完全係冇可能發生嘅，簡直係由期望變成失望再走到絕望！以下5個理想與現實嘅對比，相信各位媽媽一定好有共鳴。

Photo from MamiDaily

1. 熱鬧與嘈吵
以為多個人會熱鬧啲？其實熱鬧同嘈吵只係一線之差！BB細細個唔識表達，只係識得成日喊去吸引父母注意。加上BB愈大，學識尖叫、大嗌同人嘈交，製造好多噪音，有時真係令人好煩躁！

2. 小朋友幫手做家務
爸爸媽媽一定有諗過，小朋友識行識走時，會幫手做家務，去超級市場購物都有小幫手拎嘢。可惜事實係，佢哋只會令到屋企好亂，仲要係每一個角落都堆滿玩具！佢哋唔搞亂間屋已經係最大嘅幫忙啦！

Photo from MamiDaily

3. 溫馨小家庭
未生BB前，腦海入面有一個好溫馨嘅構圖，爸爸、媽媽同小朋友，三個人一齊好幸福嘅畫面！現實係，BB永遠都會痴住媽媽！日常生活經常扭抱，夜晚瞓覺又要一齊瞓大人床或者抱住瞓，仲要餵奶！雖然爸爸有時都會幫手，不過同幻想嘅畫面真係好大出入。

4. 帶住BB四圍遊歷
放假嘅時候，一家三口去唔同地方玩。爸爸負責帶路，媽媽推住BB車，輕輕鬆鬆周圍去。事實係平日湊住個仔人累心更累，放假嘅時候只係想喺屋企好好休息。就算真係要出街，都絕對唔會係好輕鬆，因為帶BB出街有好多嘢要帶，放滿架BB車都仲要帶多個湊仔袋！

Photo from MamiDaily

5. 感情會愈來愈好
曾經以為有咗BB後，兩公婆嘅感情會因為小朋友變得愈嚟愈好。可惜嘅係，多咗個小朋友要諗嘅嘢多咗好多，兩個人嗌交嘅話題由日常生活，轉變成因為小朋友嘅事而嘈。另外，湊住BB真係會令人好崩潰，好多時都會遷怒於另一半。

雖然生咗BB嘅生活同自己想像嘅畫面有好大出入，有時照顧佢哋都會覺得好辛苦。不過睇住BB愈嚟愈大個，學識愈嚟愈多嘢，做媽媽嘅真係會好感恩，絕對唔會後悔生BB。

Text：Mami Editorial