新手媽媽身份轉換 唔習慣嘅4件事！

做咗媽媽後，屋企多咗個人仔，好多嘢都唔同晒！新手媽媽唔止好多挑戰，仲有好多日常生活嘅小事都唔習慣，絕對需要一個過渡期。以下呢4件事，唔知各位媽媽又習慣咗未呢？

Photo from MamiDaily

1. 唔再同BB連成一體
BB喺肚入面同自己血脈相連嘅感覺漸漸冇咗，以前大住肚嘅時候，去到邊都有BB陪住自己。依家當然都可以帶埋BB出街啦，不過要帶多好多嘢，仲要推住BB車一抽二袋！好唔慣BB唔喺肚入面陪住自己啊⋯

2. 睡眠質素急降
BB出咗世之後，真係好忙好多嘢學！用晒一日嘅時間照顧BB都唔夠，每日瞓得兩、三個鐘真係好唔慣。以前連續通宵幾晚都頂得順，依家每日嘅睡眠質素都差到不得了！成日夜晚都畀阿B嗌醒，慘！

Photo from MamiDaily

3. 與朋友的共同話題減少
做咗媽媽後，真係不自覺將所有時間放晒喺屋企，好多時朋友嘅聚會都出席唔到。到約得成見面之後，發覺朋友傾緊嘅話題自己好似有少少插唔到嘴。

4. 冇晒私人時間
除咗湊住BB，仲要打理屋企嘅大小事務！僅餘嘅少少私人時間，就係BB瞓覺之後，自己瞓覺之前。諗諗吓以前未生BB嘅時候，都未算係最攰。依家嘅自己雖然做咗成日家務、湊住BB，攰到無力，但都想善用埋嗰少少時間放鬆吓！

Photo from MamiDaily

Text：Mami Editorial