最大成就感嘅職業 一定係做媽媽！

做媽媽獲得嘅成就感，絕對唔會差得過喺工作上得到嘅。湊住小朋友雖然有時好辛苦，不過好多日常小事已經令人好滿足！以下呢幾件事相信各位媽媽一定有共鳴～

Photo from MamiDaily

1. 掃風
每次餵奶見到BB乖乖地飲晒成樽奶已經好開心，不過幫佢掃風嘅時候，好快聽到「嗝」一聲就好有成功感！證明自己手勢同技巧愈嚟愈好，同BB愈嚟愈夾！

Photo from MamiDaily

2. 仔女被稱讚
平時帶住小朋友出街，有啲陌生人讚自己嘅仔女真係會有少少沾沾自喜。不論佢哋係讚小朋友得意、可愛、乖巧、有禮貌，做媽媽嘅都會覺得好自豪，簡直開心過人哋讚自己啊！

3. 清晒食物
自從做咗媽媽後，經常要下廚，不時被仔女嫌棄！有時問佢哋：「媽媽煮得好唔好食啊？」佢哋專登唱反調高呼唔好食，當下真係會唔開心。不過見佢哋食晒自己辛辛苦苦準備嘅食物，仲想添食嘅話，真係好有動力以後繼續整更多美食！

Photo from MamiDaily

4. 健康成長
小朋友大得好快好快，噚日佢哋只係識瞓喺度，今日已經學識轉身，聽日可能已經識行識跑！做媽媽最大嘅心願就係仔女健康成長，能夠陪伴在側已經足夠了！

5. 回望過去
有時夜晚自己一個人，諗返仔女嘅成長過程真係好感觸！每當諗起BB係自己十月懷胎生落嚟，然後又一手一腳咁湊大佢，由咩都唔識，變到餵奶、換片等，咩都好熟手，真係要畀啲掌聲自己！陪住BB成長呢個過程，真係好珍貴，賺幾多錢都賺唔到呢種成功感！

Photo from MamiDaily

Text：Mami Editorial