超強大媽媽圈子！6個熱門通訊群組類型

準媽媽有咗BB後，除咗上網做research搵資料外，加入一啲俗稱「媽媽谷」嘅網上群組搵同路人就最方便快捷啦。有唔明或者想知嘅野時，可以直接問其他媽媽；得閒嘅時候可以參加佢哋嘅聯誼活動，大家嘅小朋友又可以結伴一齊玩；唔開心嘅時候又可以搵戰友傾吓偈，好處多籮籮！

Photo from MamiDaily

1. 同年同月BB谷
呢種類型嘅群組主要畀媽媽搵返同自己BB同年同月，甚至同日出世嘅小朋友，一嚟可以結交朋友，二嚟可以一齊搵生日會、影相會等等。當然都會喺入面交流其他資訊啦！

2. 母乳分享
未餵過母乳真係咩都唔識，除咗喺健康院有姑娘教，返到屋企有其他疑問最好就係入呢啲分享group！入面嘅媽媽好多都無私咁同新手媽媽分享有用嘅母乳資訊，就算少奶水、上唔到奶都可以搵人問吓啦～

Photo from MamiDaily

3. 親子好去處
放假唔知去邊到玩好，呢啲媽媽谷一般都會有齊最新嘅親子好去處資料～ 邊度有新嘅親子餐廳、新嘅遊樂場等等，帶埋BB一齊去玩唔怕留喺屋企悶親。

4. 學校資訊
唔知幾時開始報名、邊間學校校風好啲、有一條龍服務等？可以喺呢類群組同各位媽媽一齊傾吓，有時仲可以傾埋面試有啲詳情㖭！

Photo from MamiDaily

5. 著數谷
小至超級市場有咩平嘢，大至BB展有咩抵買推介都一應俱存，總之邊度有好嘢都逃唔過媽媽嘅法眼！

6. 心事谷
湊B生活會有好多唔同嘅問題，同時亦有機會引爆兩公婆一直都存在嘅隱藏危機！有咗呢啲心事谷，可以喺入面搵到同路人傾吓偈，現實生活中一啲難以開口嘅難題亦都可以搵到人幫手解決啦！

Photo from MamiDaily

各位只要好好善用呢啲媽媽谷，好多時候都可以搵到實用嘅資料，又可以擴大朋友圈子，唔好過份濫用或者同其他媽媽比較，絕對係利多於弊！

Text：Mami Editorial