【攻略】6大方法幫幼兒戒尿片

根據衛生署指引，只要小朋友2個舉動：大便時間開始變得有規律，或者可以用簡單動作、言語表達想去洗手間，家長就可以準備幫佢哋戒片啦！不過，要點幫小朋友戒片？即刻睇下！

Photo from MamiDaily

1. 首先必須有一個適合小朋友去洗手間嘅環境，除咗要有一個啱小朋友size嘅廁所板，仲要準備一張櫈仔，畀小朋友可以自行坐上馬桶。

2. 家長要話畀小朋友知，如果需要去洗手間時，應該如何表達。例如：教佢哋一啲簡單嘅發音，如尿尿／便便；用動作示意，如：指住洗手間、用手捂住屁股等。

Photo from MamiDaily

3. 小朋友最初可能未識表達想去洗手間，家長可以定時帶小朋友去一去洗手間，即使佢哋冇意欲去洗手間，都可以藉此培養佢哋有一個去洗手間的習慣。

4. 當小朋友開始識得表達，又慢慢適應去洗手間時，家長可以試下畀小朋友日頭著內褲、夜晚先用尿片，減少用尿片嘅次數。

Photo from MamiDaily

5. 家長可以同小朋友玩公仔去洗手間嘅遊戲，講一啲關於去洗手間嘅故事。另外亦可以同小朋友一齊去洗手間，等小朋友可以有機會模仿。

6. 每日畀小朋友吸取充足嘅水分及纖維質，令排泄暢通。

Photo from MamiDaily

Text：Mami Editorial