懷胎6月單親媽 按摩後流產 昏迷不醒半年亡

一名懷孕6個月嘅媽媽，前往按摩店做傳統泰式按摩，一個鐘後突然抽搐昏迷。送到醫院後不但流產，更持續半年昏迷不醒，一直靠呼吸機維生，後來家人決定拔喉，於7月19日離世。

據外媒報導，一名25歲，任職模特兒嘅單親媽媽Wirawan Kedkesri，育有一名5歲兒子。今年1月時正懷上第二胎，懷孕6個月嘅佢去到清邁一間按摩店做泰式按摩。幫佢按摩嘅職員表示因為佢係孕婦，唔適合做全身按摩，於是Wirawan Kedkesri做咗一個鐘足部按摩，集中按腳及小腿，然後再按肩膀。

Photo from MamiDaily

職員中途離開房間，後來返嚟發現Wirawan Kedkesri身體抽搐，失去意識躺臥在床。職員立即報警，送往醫院後，Wirawan Kedkesri出現中風及心臟驟停等症狀，肚中6個月嘅胎兒亦流產，而Wirawan Kedkesri則一直處於昏迷狀態。

醫生指，Wirawan Kedkesri患有肺栓塞及缺血性中風，大腦動脈亦有阻塞，需要靠呼吸機維持生命。Wirawan Kedkesri昏迷咗大半年，直至今個月19日，家人決定拔掉呼吸機。Wirawan Kedkesri喺5歲兒子嘅陪伴下離世。家人表示：「呢個係一個非常沉重嘅決定，但佢依家終於得以平靜，安詳離開。」

事發後，家人對按摩店提出控訴，但按摩店堅拒負責及作出任何賠償。而警方表示，已對該名職員提出業務過失及傷害罪控告，現正搜集醫療證明、翻查閉路電視。

懷孕期間進行適當按摩，可減輕懷孕時出現嘅不適。但建議懷孕首3個月嘅孕婦要特別留意小心，因胚胎尚未完全發展穩定，進行按摩較易增加流產機會。另外，孕婦按摩時亦要留意精油嘅成分，部分精油可能會影響胚胎，甚至令子宮收縮。若果喺按摩過程感到不適，亦應立即停止。

Photo from MamiDaily

Text：Mami Editorial