養兒方知父母恩 做咗媽媽先明嘅6件事

「養兒方知父母恩」，以前細個成日唔明點解父母成日咁長氣，咩都要講好多次。做咗人哋媽媽之後先至發現，原來講幾次其實都唔夠，再講多十次都驚佢哋唔記得。有好嘢自己冇經歷過真係唔會明，到依家有自己嘅仔女終於都感受到以下呢6件事。

Photo from MamiDaily

1. 杞人憂天
養兒一百歲，長憂九十九。自從生咗BB後，每日都會諗好多關於仔女嘅嘢，將所有小事無限放大，例如冷氣凍少少都驚佢凍親、食完飯轉個頭又驚佢唔夠飽等等。做咗阿媽真係咩都會擔心一餐，以後唔會再覺得阿媽煩。

2. 寧願代仔女病
以前媽媽見到自己有病有痛，成日都話寧願病嗰個係佢自己。到依家自己仔女病咗真係心痛到爆，分分秒秒都要望住佢、照顧佢先至安心。幾時都話小朋友身體健康就係媽媽最好嘅禮物！

Photo from MamiDaily

3. 駁咀令人傷心
細個唔懂事，好多時都專登同媽媽唱反調。依家先至明白仔女駁嘴駁舌，有幾無奈、有幾激氣！媽媽講啲咩其實都係為我哋著想～

4. 煮完飯唔想食
以前細個唔明點解媽媽煮完飯，成日都唔想食。 原來係廚房搞完一大輪，又熱又攰出到嚟真係冇咩胃口。不過見到一家人食得開心就咩都值得啦！

Photo from MamiDaily

5. 仔女開心大於一切
媽媽可以為咗仔女做任何事情，就算要犧牲啲嘢，都在所不惜！只要佢哋開心，媽媽就好滿足。

6. 將最好給最好
為咗BB成長得好啲，媽媽可以將多啲資源留畀佢。依家唔會亂買嘢，寧願留返啲錢畀BB，買多件衫仔、玩具畀佢、學費貴啲都要報間好學校等，將最好給最好。

Photo from MamiDaily

Text：Mami Editorial