【共鳴】在職媽媽才懂的事！細數5大辛酸時刻

無論全職定在職媽媽，都希望可以將最好嘅嘢奉獻畀家庭。有人會話在職媽媽只係顧住返工賺錢，唔湊BB，工作比自己仔女重要等等。但其實在職媽媽並不比全職媽媽輕鬆，每日同時兼顧家庭及工作，彷彿打兩份工一樣。相信大部分在職媽媽都曾經有以下情況出現。

1. 被鬧唔湊仔

在職媽媽因為要工作嘅關係，好多時都迫不得已要將仔女交畀工人或長輩代為照顧。身邊人得知後，可能會認為媽媽「淨係掛住做嘢，唔理仔女」、「掉低仔女喺屋企」。其實媽媽們工作都係為咗頭家，試問邊個父母唔想有多啲時間陪仔女。

Photo from MamiDaily

2. 24小時唔夠用

一早起身返工，放工即刻趕去接返仔女，返到屋企仲有一大堆家務要做，又要準備晚餐，幫BB沖涼，?BB瞓教……唔好話私人時間，處理好晒所有家頭細務後，都得返幾個鐘休息，每日如是，廿四個鐘真係唔夠用！

Photo from MamiDaily

3. 每朝出門口都趕頭趕命

未有小朋友之前，每朝起身後都有時間襯衫、化妝。有咗小朋友後，累得每日都瞓到最後一分鐘先起身。而小朋友見到媽媽要出門口返工，又會情緒失控，大哭大鬧，糾纏完一輪，就算媽媽幾唔忍心、幾不捨都好，仍要趕住出門口去返工。

Photo from MamiDaily

4. 人在公司 個心就掛住阿B

平時離開阿B一陣，都覺得唔安樂，會心掛掛。返足全日工，見唔到阿B，唔止掛住，仲會好擔心。唔知工人或長輩有冇睇實阿B，阿B夠鐘飲奶、換片……無時無刻都諗起阿B，好想快啲放工返屋企見阿B。

Photo from MamiDaily

5. 地位不保

要工作嘅關係，唔能夠經常喺阿B身邊，同阿B相處得最長時間嘅就係工人或長輩。感情慢慢累積，阿B最倚賴嘅人就係佢哋。當阿B大哭大鬧時，眼見能夠安撫到佢嘅人，並唔係自己，感覺同阿B嘅距離好似又遠咗。

Photo from MamiDaily

Text：Mami Editorial