家長注意！喺小朋友面前唔可以做嘅4件事

父母係小朋友第一個學習對象，爸爸媽媽絕對要做個好榜樣！喺一個良好嘅環境成長，對BB嘅發展一定有幫助。為咗BB，以下呢4件事家長喺屋企切記唔可以做。

Photo from MamiDaily

1. 鬧交
就算意見不合，都一定一定唔可以喺BB面前嗌交。一嚟佢哋見到父母鬧交，佢哋唔知發生咩事，唔知係咪因為自己令到父母唔開心，因此會令到佢哋好驚。二嚟，唔好以為小朋友唔識聽，父母嗌交時講嘅嘢，佢哋就算唔明白咩事情都會牢牢咁記住喺心入面，有機會影響佢哋嘅心理健康。

2. 講家人壞話
有時老公做咗啲唔好嘅事，唔好貪得意向小朋友告狀，例如「你爸爸噚日又好夜返屋企，又唔知去咗邊度玩」。要記住呢啲係夫妻之間嘅問題，唔係家庭問題，唔使下下同小朋友講，就算佢哋知道亦解決唔到。等仔女瞓咗覺後，兩老婆閂埋房門傾吓，溝通多啲順便將心結解開啦！

Photo from MamiDaily

3. 情緒失控
仔女愈大愈反叛，好多時真係畀佢哋激親。但係喺佢哋面前，一定唔可以將呢啲負面情緒展示出嚟。情緒激動嘅時候，有時自己都控制唔到自己會講啲咩說話，嚴厲嘅斥責或者會令小朋友驚咗自己，或者遠離你。

4. 講粗口
好多人都會講粗口，當然喺小朋友面前就最好唔好講！父母返咗屋企嘅話就盡量忍口，最重要係一定唔可以畀小朋友聽到，唔係佢哋有樣學樣就慘了！爸爸媽媽最緊要做個好榜樣～

Photo from MamiDaily

Text：Mami Editorial