【小心中伏】聘請陪月 3大注意事項

好多媽媽生完BB後，都會選擇請陪月幫自己照顧初生BB，同埋調理身體。搵到一個好嘅陪月，唔單止可以同媽媽分享育嬰經驗同技巧，仲能夠減輕佢哋唔少負擔同壓力。今次同大家分享幾個選擇陪月時需要注意嘅事項。

1. 表明自己需要

為咗可以搵到一個真正適合自己所需嘅陪月，媽媽喺選擇陪月時，如對陪月有特別要求，應預先表明，例如需要一個識胸部按摩，可以解決到塞乳腺問題嘅陪月、主要係照顧BB為主嘅陪月等。

Photo from Mamidaily

2. 面試

媽媽喺電話或同陪月面談時，可以先簡單介紹自己，BB預產期、第一胎定係家中已有其他子女、有咩要求等。然後請陪月講下自己嘅經驗及長處，有冇證書證明等。另外，其實媽媽亦可再問詳情少少，例如之前有冇湊過早產BB，點樣應對BB嘅突發狀況等，進一步了解下陪月嘅經驗幫唔幫到自己。

Photo from Mamidaily

3. 合約

為咗避免不必要嘅糾紛，合約一定要清楚列明所有細節事項。以下幾項為最重要最普遍必須具備：係咪要畀開工利是、額外車費及買餸錢、工作時間、加班費、工作範圍、取消陪月員條款等。

Photo from Mamidaily

Text：Mami Editorial