細女確診神經母細胞癌 媽媽：我們會堅強面對

小朋友唔好彩染上小病如感冒，父母都「羅羅攣」徹夜難睡，更何況仔女不幸患上罕見病呢？16個月大嘅小女孩艾婷曦早前確診神經母細胞癌，腹部入面快速生長嘅腫瘤，令一家人徬徨不安。媽媽永遠係仔女最強大嘅後盾，面對未知嘅一切亦只能堅強。

Photo from Lo Ya-chu Facebook授權

來自台灣、現居香港嘅媽媽亞竺婚後育有2個女兒，細女艾婷曦（Ylona）依家1歲4個月大，喺四個月大嘅時候，佢突然嚟咗人生第一次月經。當時亞竺馬上帶佢去檢查，醫生指應該係賀爾蒙影響導致性早熟，而當時流血嘅狀況只係維持咗一個星期。

Photo from Lo Ya-chu Facebook授權

自從嗰次月經來潮，Ylona身體並冇其他異樣。直到今年3月又再出血，到4月嘅時候，更加喺佢下腹發現有局部硬塊。覆診時，由於Ylona冇感覺到有痛楚，醫生表示只能繼續觀察。

Photo from Lo Ya-chu Facebook授權

直到5月中，小朋友開始變得冇心機，唔想食嘢、又唔去玩，加上肚入面嘅腫塊亦都大咗好多，媽媽即刻帶佢去睇急症。好景不常，醫生報上壞消息，指出腫瘤太大，影響腎功能，需要喺Ylona兩邊腎臟插入尿管及尿袋幫助排尿。

Photo from Lo Ya-chu Facebook授權

經歷多次檢查，最後終確診神經母細胞癌。媽媽雖然心痛，但必須強大起來照顧寶貝女兒：「無論如何，我們都會堅強的面對。」Ylona亦即將開始漫長又難捱嘅抗癌路，面對龐大嘅嘅醫療費用，媽媽於5月尾發起網上眾籌，望各位有心人士能伸出援手，幫助呢個只有1歲嘅生命小鬥士，為佢哋一家打打氣。

眾籌網址：https://gogetfunding.com/ylonas-medical-fund/

＊剛收到媽媽嘅訊息，佢話原來呢個眾籌網址已經失效，如果希望幫助佢哋一家人的話，可以喺Facebook聯絡媽媽。

Text：Mami Editorial
圖片授權：Lo Ya-chu Facebook