Bob愛女患手足口病醫生指高度傳染在家隔離2星期

By Jacqueline on 15 Jun 2019

Senior Editor

日前，藝人林盛斌（Bob）嘅囡囡林菲兒就喺社交網站度做直播，帶住口罩嘅佢表示自己患上手足口病，所以冇返學。佢話夜晚突然見到身上出紅點，覺得又攰又好痕，當時以為自己間房有蚊，林太就懷疑囡囡患手足口病。睇咗醫生後，醫生指退燒後兩個星期都唔好返學，因為會高度傳染。而為咗避免傳染細佬同細妹，菲兒盡量都留喺房間休息兼帶上口罩。

Photo from 林菲兒IG

衞生防護中心指出，手足口病高峰期為5月至7月。患者喺病發初期通常會出現發燒、食慾不振、疲倦及喉嚨痛。發燒後1至2日，口腔可能會出現疼痛嘅水疱，水疱初時呈細小嘅紅點，然後會形成潰瘍。潰瘍通常位於舌頭、牙肉以及口腔的兩腮內側。另外，手掌及腳掌，甚至臀部及／或生殖器亦會出現不痕癢及有時會帶有小水疱嘅紅疹。手足口病患者亦可能沒有病徵，或者只出現皮疹或口腔潰瘍等病徵。

Photo from Mamidaily

預防手足口病方法：

1. 經常保持雙手清潔，尤其喺觸摸口、鼻或眼之前，進食及處理食物前，接觸水疱後，及如廁後。如冇洗手設施，用含70 － 80%嘅酒精搓手液潔淨雙手亦可行。
2. 打噴嚏或咳嗽時應用紙巾掩蓋口鼻，將用過嘅紙巾棄置喺有蓋垃圾箱內，然後徹底清潔雙手。
3. 用膳時要用公筷同公匙，唔好同其他人共享同一食物或飲料。
4. 唔好同其他人共用毛巾或其他個人物品。
5. 避免同患者有親密接觸，如接吻、擁抱。
6. 經常清潔及消毒常接觸嘅表面，如傢俬、玩具、共用物件。