父母嘅角色係指導 而非批評

小朋友雖然人仔細細，但係已經有好多諗法、感受。佢哋嘅情緒智能（EQ）唔止受先天影響，後天嘅學習同培訓都好重要！而父母嘅角色就更加係舉足輕重，適當嘅教導對小朋友嘅情緒健康、人際關係同成就都有重大嘅幫助。

Photo from Mamidaily

1. 父母注意自己嘅情緒健康
呢一點係最重要嘅！父母必須要了解自己嘅情緒先至可以慢慢教導仔女，所以有啲咩需要，情緒上有啲咩起伏都要搵另一半或其他可靠人士傾訴。

2. 留意孩子嘅情緒需要
喺學習階段嘅小朋友未必識語言、說話去表達自己嘅感受，父母需要仔細聆聽同觀察佢哋嘅行為，包括語氣、面部表情、姿勢，喺呢啲蛛絲馬迹中，搵出佢哋內心真實嘅想法。

Photo from Mamidaily

3. 教導孩子觀察自己同其他人嘅情緒變化
父母可以同小朋友分享自己嘅感受，不論係負面定正面，從中分享同示範自己嘅處理方法。
另外，父母亦應教導孩子有關情緒嘅詞彙，方便佢哋辨識自己嘅情緒。

4. 多聆聽、少批評
父母應嘗試設身處地，以孩子嘅角度出發，更容易明白孩子嘅感受。同時亦應避免經常用負面嘅說話批評孩子，過急作出判斷同批評亦都唔係一個正確嘅做法。

Photo from Mamidaily

5. 指導孩子解決問題
為孩子清楚界定咩係不適當行為，例如一啲傷害其他人或自己嘅行為，等佢哋明白以呢啲方式表達負面情緒係唔啱嘅。應該要引導孩子搵出引發情緒嘅原因，只要認清問題所在，先至可以有效咁解決件事。

6. 親子時間
每天最少用15分鐘同仔女玩遊戲或者傾下當日發生過嘅事，喺過程發掘生活中正面嘅嘢，好似係今日老師讚賞自己咁，培養樂觀嘅想法。

Photo from Mamidaily

7. 肯定和讚賞
留意下佢哋嘅優點同長處，不時對孩子嘅表現加以讚賞，增強自信心。

8. 期望要切合實際
人人都有唔同嘅性格，要接受小朋友嘅個性同興趣，唔好逼佢哋做啲唔想做嘅事。同時亦唔好將目標定得太高，唔係反而會畀到壓力佢哋，造成反效果。

Photo from Mamidaily

Text：Mami Editorial
Source：衛生處