將仔女放喺第一位！產後8個考驗 你中幾多？

由拍拖到結婚，婚後再生埋小朋友，生活上會有好多改變，兩個人嘅關係都因而會有好多挑戰。好多人都話生完BB嘅第一年係最難捱嘅，如果以下8個感情危機都中咗大部份嘅話，可能你哋嘅婚姻響緊警號喇！

1. 稱呼改變
未生BB之前，兩公婆可能有專屬嘅名稱，好似老公老婆、Honey、寶寶等。BB出世後，叫對方可能都只會嗌Daddy、媽咪，咁樣好容易只記得自己係「父母」，忘記咗自己有「夫婦」呢個身份！

2. 忽略對方
話題只圍繞小朋友，講啲咩都可以講返有關仔女嘅問題。例如問對方放假去邊度玩好，答案可能係不如去新開嗰間餐廳啊，兒童餐好啱阿B食啊！

Photo from Mamidaily

3. 意見分歧
兩夫妻都想將最好嘅嘢畀晒仔女，好多時講緊關於BB嘅嘢都會忍唔住嘈幾句。小至BB著咩衫、大至食咩奶粉、讀邊間學校，全部都成為爭拗話題。

4. 好少二人世界
湊BB已經佔咗好多時間，基本上BB出咗世之後只有三人世界，冇二人獨處嘅時光，連睇場戲嘅時間都冇啊！

Photo from Mamidaily

5. 強忍不滿
照顧小朋友嘅心力交瘁，有時對方嘅一個好微小嘅舉動都會觸發到神經。不過湊住個仔都冇乜心機即時指證，將呢啲不滿默默記喺心入面，好易成為日後嘈大交嘅導火線。

6. 欠缺交流
放工返到屋企抱完BB好多時都各有各忙，有時可能掛住玩電話、打機，食完飯餵完阿B又夠鐘上床瞓覺，一出聲可能就有磨擦。好少傾心事嘅關係真係唔係幾健康！

Photo from Mamidaily

7. 唔夠體諒
媽媽生完BB，情緒起伏比較大，另一半聽到媽媽喊可能覺得煩；有時爸爸忙住工作，冇覆訊息又或者返到屋企想打機放鬆下，另一半可能覺得佢掛住玩唔理屋企。兩夫妻其實應該企係對方嘅角度諗下，就會發現其實呢啲都係好小事。

8. 計較付出
經常記住對方冇做啲咩嘢，忽略咗對方為家庭嘅付出，例如返工賺錢、全力湊仔、做家務等。

Photo from Mamidaily

Text：Mami Editorial