【沖涼玩具】網購小黃鴨 75%塑化劑超標 可致性早熟！

好多家長都會喺小朋友沖涼嘅時候，放啲小黃鴨喺水中，陪佢哋一齊沖涼。不過要小心，因為依啲小黃鴨唔單止容易滋生細菌，仲有機會損害健康，導致兒童性早熟。

日前，內地有環保組織做咗一項調查，喺3大網購平台隨機買咗12款小黃鴨玩具，塑化劑送檢結果顯示其中9款唔合格，每個平台各有3款，整體不合格率達75%。除咗今次調查外，過往亦曾經有10位家長分別喺網上買咗10款塑膠玩具，委託送檢後發現，其中7款亦有塑化劑超標問題，而超標範圍更高達290倍至417倍。

Photo from MamiDaily

小黃鴨類玩具遇到熱水或沐浴液等油性物質時，好容易會釋出塑化劑。另外，小朋友更可能會用嘴咬玩具，嚴重影響健康。

塑化劑對人體嘅肝臟、腎臟器官都有害。特別係正處於發育早期同分化發育敏感階段嘅兒童及孕婦。除咗會影響人體激素系統，仲有可能會導致兒童性早熟，對神經發育造成一定嘅影響，而對成年人嘅影響則包括：令男性嘅精子數量減少、運動能力下降、形態異常等。

Photo from MamiDaily

Text：Mami Editorial