BB係演戲高手？扮喊前後兩個樣？

屋企嗰個人仔真係「噪音製造機」，佢哋真係可以日喊夜喊，各位媽媽有冇留意佢哋幾時係真喊，幾時係假喊呢？日本一項研究就解答到呢個問題喇！

日本心理學家Hiroko Nakayama邀請咗2個BB（嬰兒R及嬰兒M）參與呢個長達6個月嘅實驗，期間拍攝多條短片作紀錄，發現佢哋真係扮喊高手，而且仲好有技巧。

Photo from MamiDaily

研究人員以呢2位BB嘅喊聲作分析，搵出佢哋準備喊嘅跡象同喊前喊後嘅情緒，包括痛苦嘅聲音、做鬼臉、抿嘴同微笑等。初初佢哋真係喊嘅，喊之前同之後都係表現出唔開心嘅情緒。

Photo from MamiDaily

當佢哋愈嚟愈大嘅時候，喊之前出現嘅係傷心嘅情感，而喊完後即刻好開心！就好似其中一個媽媽喺BB玩遊戲時中途離開，翻睇錄影發現BB喺哭泣前嘅最後幾秒鐘，流露出一啲正向情緒（positive emotions），並喺媽媽返到佢身邊嘅時候，馬上面露笑容，證明BB喊其實只係想引媽媽注意！

Photo from MamiDaily

BB用哭泣聲引媽媽注意究竟係唔係好事？好多父母都認為扮喊係曳曳行為，不過其實當媽媽回應佢哋時進行嘅互動，對BB係有正面影響㗎！Nakayama表示，父母回應詐喊BB時嘅互動，對佢哋嘅情感發展有好大嘅幫助，同時亦可以大力提升佢哋嘅社交能力，更容易同人建立關係！

Text：Mami Editorial

Source：Live Science