屋企多咗個人仔要注意嘅8個家居安全

當BB愈嚟愈大，好奇心多咗，活動範圍又大咗，鍾意喺屋企周圍爬，各位父母有冇留意自己屋企有冇啲潛在危機呢？究竟家居安全有冇做好呢？

1. 不要獨留孩子喺屋企
最重要就係要確保BB安全，有大人喺屋企照顧佢。另外，父母或監護人最好具備簡單急救常識，屋企亦要有藥箱，以防萬一。

2. 小心尖角家俬
屋企入面有好多「古惑」家具，例如可摺疊嘅傢俬一定要收好或鎖上，但唔好「層層疊」咁放，以免跌落嚟整傷BB。另外，有尖角嘅家俬，全部都應該要用護角包實，防止BB撞傷。

Photo from MamiDaily

3. 唔好選用玻璃家具
好多家庭未生小朋友前，或者已經用緊玻璃枱。不過生咗BB之後，最好將所有用玻璃製造嘅家具、物品全部換走晒。

4. 幫BB沖涼要留神
家長應該用膠浴盆幫BB沖涼。最重要嘅係，唔可以將BB獨留在浴盆入面，就算只係一秒都唔得！而裝住水嘅器皿唔可以隨處亂放，同時亦要保持浴室乾爽。

Photo from MamiDaily

5. 廚房係BB禁地
廚房入面太多危機，利器、煮食器皿、清潔劑、熱水壺等統統都要放喺BB接觸唔到嘅地方。所以門口應該要設置圍欄，以免BB貪玩爬咗入去。

6. 房間安全
如果房間有碌架床，要注意梯子夠唔夠穩固；碌架床同牆之間唔應該有空隙。

Photo from MamiDaily

7. 床欄高度要注意
當BB喺BB床時，應該拉上欄並閂好。BB床嘅欄同欄之間嘅闊度應該少過６公分（2.5吋），床欄嘅高度應該要多過小朋友身高嘅四分之三。

8. 收好繩子
屋企如果有窗簾嘅，要確保BB接觸唔到窗簾嘅繩；同樣道理，BB床上亦唔應該有懸空嘅繩，以免BB拎嚟玩！

Photo from MamiDaily

Text：Mami Editorial