【媽媽唔易造】一蚊Joe夫婦北上睇神醫過程驚險又艱辛！

By Jacqueline on 29 May 2019

Senior Editor

TVB節目《媽媽唔易造》，最新一集請嚟游莨維（一蚊Joe）同佢太太Clara，分享北上睇神醫求子嘅驚險體驗。兩公婆指內地嘅醫療文化真係令佢哋大開眼界，除咗衛生同私隱問題外，抽卵嘅過程亦好恐怖！

輸卵管堵塞每日飲「蜈蚣神藥」

一蚊Joe同太太Clara係因為一次工作合作而認識，兩人結婚時，Clara已經38歲，屬於高齡產婦，為進行造人大計，Clara去咗做產前檢查，點知發現兩邊輸卵管都堵塞，Clara做手術切除其中一邊輸卵管，醫生指如果想生小朋友，只可以做人工受孕或試管嬰兒。兩夫妻都不敢怠慢，立即行動。Clara首先調理身體，經親友介紹下，去咗內地睇神醫。當時嗰位醫生開咗啲中藥畀Clara，話起碼要食2至3個月中藥先得。每一包中藥入面仲要有一條乾蜈蚣，Clara指：「煲出嚟啲藥係黑色，好苦。」最後成功將Clara嘅輸卵管通了，於是就決定開始進行「求子大計」。

Photo from 無綫電視截圖

北上搵神醫兩公婆大開眼界

不過，由於香港公立醫院需要排期2至3年，加上收症條件為40歲以下女士、而私家醫院費用高昂，於是兩公婆最後搵咗一間內地試管嬰兒專科醫院。兩公婆憶述第一次踏足內地專科醫院嘅情況：「去到嗰到，見到不孕科係烏燈黑火閂晒門，喺門口偷望時，有個著住白袍嘅醫師就問我哋做咩事，原來佢就係我哋約見嗰位醫生。見到佢著住白袍同帶住浴帽嘅造型，真係有啲驚。入到診症室見醫生，上一個病人仲喺度，附近亦有好多人出出入入，冇私隱，打尖亦見慣不怪。」雖然係咁，但Clara就話當係一個經歷，覺得熱鬧啲一齊討論下，反正大家個案都差唔多。

Photo from 無綫電視截圖

冇麻醉抽卵痛不欲生

去到照超聲波時，Clara坦言衛生情況同香港差異大，4個人輪流做檢查，成個過程醫生都冇洗過手同換手套，仲話如果大家好緊張呢啲，真係會有啲驚。進行完檢查，醫生表示對佢哋嘅個案好有信心，開咗排卵針畀佢哋。後來排卵成功，於是就進行抽卵。Clara提到抽卵過程非常痛苦：「以我所知，喺香港抽卵係可以打麻醉藥，但喺內地抽卵係『監生』抽出嚟，隔離床啱啱抽完卵嘅女士仲話唔痛，點知到我嘅時候，簡直係痛不欲生，歷時15至20分鐘，好似將枝針，一下一下咁拮入卵巢度。」而一蚊Joe亦指收集精液嘅過程都好隨意，朋友仲講笑問會唔會搞錯咗其他人嘅精液。

Photo from 無綫電視截圖

一索得男不忍見到太太受苦

幸好過程順利，當中有13粒卵子成功受精，最後有8粒發育理想嘅胚胎，於是兩公婆決定先放3粒入體內，最後幸運地有1粒成功著床，返到香港驗血後發現Clara一索得男，兩公婆都好開心。一蚊Joe喺節目尾聲更感激Clara為咗家庭嘅付出：「有咗BB，我係好感恩，但係每一次見到太太受苦，個感覺都係唔好受。我同佢走過嘅依段路，係令我哋感情更加深厚，Happy wife，Happy life！」