健康警號！女性4大必做身體檢查

現今世代好多女性都忙住工作、照顧家庭，忽略咗自己嘅健康狀況。病痛好多時話嚟就嚟，毫無先兆！唔係話每年做個普通身體檢查咁簡單，仲要特別留意個body check會唔會有埋以下4個本港女性最常見疾病嘅婦科檢查啊！

1. 乳房X光造影

乳癌係本港女性最常見嘅癌症。根據衛生署資料顯示，喺2016年，乳癌佔本港女性癌症新症總數26.6%，總共有4108宗。喺2017年，乳癌嘅死亡率佔女性癌症死亡人數12.3%，係排列第3位嘅致命癌症。而病發年齡有年輕化嘅趨勢，以往患者一般會喺60歲以後先病發，近年則下降至大約40歲。

Photo from Shutterstock

乳房X光造影係乳癌常用嘅篩查方法，利用X光拍攝乳房影像。檢查過程中，乳房需要放喺兩塊儀器夾板之間，並擠壓乳房令到佢嘅乳房組織平均分佈。一般嚟講，乳房X光造影檢查係安全嘅，喺過程中只會用到少量輻射。如果有家族乳癌或卵巢癌病史，尤其是有直系親屬（媽媽、姐姐或女兒）喺50歲之前確診患乳癌，就要盡快做檢查，及早發現癌症，有助提高治療成效！

Photo from Shutterstock

2. 盆腔超聲波掃描

卵巢癌係第6個香港女性最常見嘅癌症。卵巢癌係指出現喺卵巢嘅惡性腫瘤，喺2016年，女性卵巢癌新症共有585宗。喺2017年，香港共有218名女性死於子宮頸癌，佔女性癌症死亡人數3.7%。有強烈嘅家族卵巢癌或乳癌病史、或帶有某啲遺傳性基因突變嘅女士，患上卵巢癌嘅風險較高。

Photo from Shutterstock

盆腔超聲波掃描係一個可以檢驗子宮、卵巢等器官有否產生病變嘅婦科檢查，仲有助診斷到子宮纖維瘤、朱古力瘤等。不過香港防癌會表示，依家其實暫時仍未發現有效嘅普查方法能夠及早察覺卵巢癌。就算女士每年接受盤腔同子宮頸抹片檢查，亦都未必能夠搵出初期跡象。曾經有病人將病徵誤以為係胃痛或者消化不良而掉以輕心，令到病情惡化。所以40歲或以上嘅女性，如果持續出現腹部唔舒服或者肚脹，應盡求醫同埋做一個詳細嘅檢查。

3. 子宮頸細胞檢查（柏氏抹片）
子宮頸癌喺香港女性最常見嘅癌症中排第7位，根據衛生署資料顯示，喺2016年，女性子宮頸癌新症共有510宗。喺2017年，香港共有150名女性死於子宮頸癌，佔女性癌症死亡人數2.6%。

Photo from Shutterstock

除咗上面提到嘅盆腔超聲波檢查，子宮頸細胞檢驗亦都可以檢查到子宮頸內有冇不正常嘅細胞。呢個檢查快捷又簡單，成個檢查過程只需幾分鐘，醫生或護士會將一個窺器放進陰道內，然後用小刮棒或刷子喺子宮頸嘅表面輕輕抽取一啲細胞樣本檢驗。年齡介乎25至64歲而曾經有性經驗嘅婦女，就算已經接種HPV疫苗，都應該定期接受子宮頸癌篩查。

Photo from Shutterstock

4. 骨質密度檢查
骨質疏鬆症係一種骨骼新陳代謝嘅病症，骨質密度減少，令骨骼結構變得脆弱，因而容易導致骨折。長者、女性（女性患病率比男性高，一般喺停經後，雌激素停止分泌後）、體型瘦小、家族中有骨質疏鬆症患者、不良生活習慣者、長期服用高劑量類固醇藥物嘅人等等，都係高危一族。

Photo from Shutterstock

雙能量X光吸收測量儀（Dual-energy X-ray Absorptiometry, DEXA）可以用嚟診斷骨質疏鬆症同埋監察治療效果。呢個儀器係透過X光測量骨質密度，成個檢查過程簡單、快捷且安全。如果係高危人士，就要盡快尋求醫生意見，做個詳細嘅檢查喇！

Text：Mami Editorial
Source：衛生署、香港防癌會