張智霖夫婦罕有剖白 袁詠儀最驕傲認識到老公！
藝人張智霖（Chilam）同老婆袁詠儀（靚靚）被公認為娛樂圈中最恩愛模範夫妻，不過近日佢哋到內地節目受訪時，竟然否認自己係模範夫妻？難得兩公婆一齊拍節目，佢哋唔止忍唔住互窒對方，仲難得剖白內心感受，場面搞笑又感動。
Photo from 袁詠儀微博
張智霖同袁詠儀兩公婆結婚18年，喺埋一齊嘅時間足足有成27年，依然非常恩愛。原來當年係靚靚主動追求Chilam先㗎！Chilam話當初係畀靚靚嘅外表呃咗，而靚靚就話當年其實冇諗咁多，見到鍾意嘅人緊係要即刻捉實。初初只係有啲好感，相處耐咗，靚靚先慢慢發現：「呢個男人真係相當唔錯」！
兩公婆不但事業有成、家庭幸福，囝囝張慕童（魔童）又乖巧懂事，靚靚人生竟然有遺憾？今年47歲嘅佢話，最後悔嘅事係只係生咗魔童一個，冇生多個小朋友。主持叫佢哋依家繼續努力啦，靚靚就話已經趕唔切了；Chilam為咗?返老婆，佢話不如佢同第二個人生，然後當係佢親生嘅，靚靚指住個窗話可以，Chilam玩嘢回應：「我直接跳落去搵一個」，真係搞笑又溫馨。
Photo from 袁詠儀微博
問到依家最恐懼嘅事係咩，靚靚話驚魔童話佢係壞人；Chilam就突然感性起嚟，指住靚靚話最驚係佢死，因為佢哋一齊過咗好多開心嘅日子，人生冇可能咁完美。Chilam以前亦曾經提過依家兩人年紀開始大，開始擔心要面對生離死別，因為冇嘢係永遠嘅，一定要珍惜當下。
Text：Mami Editorial
Source：節目《魯豫有約大咖一日行》
Photo Source：袁詠儀@微博、張智霖@Instagram
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
