單立文胡蓓蔚吵吵鬧鬧23年 仲係熱戀期！
藝人單立文（豹哥）同老婆胡蓓蔚呢對鬼馬夫妻一向恩愛，結婚11年依然恩愛如昔。豹哥今朝又孖住豹嫂放閃光彈啦！
豹哥豹嫂兩公婆今日喺社交平台分享咗一張食菠蘿包嘅相，就話冇時間食lunch，就食住個菠蘿包先。豹哥仲偷偷喺hashtag「打小報告」話食菠蘿包走牛油係老婆嘅意思，言語間暗指老婆唔識貨，豹嫂則馬上留言問：「你覺得你有資格加塊牛油咩？」原來係為佢健康著想咋！
人前人後都非常恩愛嘅「豹夫婦」喺1996年年底開展佢哋嘅愛情長跑，當年兩人因為音樂而相識，最後更變成一對人人羨慕嘅夫妻！豹嫂早前喺11週年結婚紀念當日自爆20幾年前，喺佢準備出碟嘅時候，遇見當時擔任唱片監製嘅豹哥，兩人因合作日久生情，仲直認係自己係主動出擊、表白先嗰個！
原來豹嫂早年係不婚主義者，由拍拖開始，從來都冇諗過要結婚，覺得就算冇名份都冇所謂，只要兩人喺埋一齊就足夠。不過當時豹嫂一位同樣係不婚主義嘅朋友，突然問咗佢一句，同另一半有咩打算，人生下一步又點樣行？嗰陣佢同豹哥都已經拍咗10年拖，呢個問題令佢思考兩人嘅將來。然後，當晚佢就即時問豹哥「不如我哋結婚啦，好唔好？」，而豹哥亦二話不說就應承咗，仲即刻籌備婚禮，果然超級錫老婆！
佢哋二人世界多年，原來豹哥一直都好想生小朋友，可惜老婆強烈反對。不過近年受朋輩影響，令一直都唔想生仔嘅豹嫂有啲動搖，依家佢哋兩個都期望可以作「最後衝刺」，生番個屬於自己嘅愛情結晶。佢哋認為就算最後失敗都唔緊要，keep住孖公仔生活一樣幸福美滿！
拍拖12年，結婚11年，相愛足足23年，依然sweet到爆！佢哋嘅熱戀期至今仲持續進行中，唔止因為豹哥無限寵愛老婆，仲因為「珍惜」兩個字。或者佢哋嘅愛情唔稱得上好轟烈，不過好似豹哥咁講，平淡其實都係一種浪漫嘅幸福！世界咁大，難得遇到一個同你相愛嘅人，就一定要好好珍惜。
Text：Mami Editorial
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
