點為BB清理鼻屎又唔會傷害BB鼻腔？ 善用2個方法將BB鼻屎清理乾淨

當爸媽發現BB鼻內充滿又大又硬嘅鼻屎，而BB經常捽鼻貌似非常唔舒服，但又無法將鼻屎捽出黎，都會好想幫一幫BB。但BB鼻孔咁細，絕對唔適宜強行用手指將BB鼻內污物強行挖出，否則容易刮傷BB嘅皮膚，亦容易將鼻屎愈推愈入，影響BB呼吸。父母可以嘗試用以下2個方法為BB清理鼻屎。

Photo from Shutterstock

1. 水蒸氣＋吸鼻器

可以喺BB沖涼時，利用水蒸氣將BB鼻內嘅鼻屎軟化，然後用吸鼻器將軟化嘅鼻屎吸出黎，但爸媽要注意BB嘅鼻非常敏感，所以吸時唔好將泵頭太深入BB鼻內，或吸得太用力，否則易整傷BB鼻腔。

Photo from Shutterstock

2. 凡士林＋棉花棒

另外，可以用BB適用於清理鼻腔嘅鹽水噴入BB鼻內，軟化鼻屎，然後用BB專用嘅小號棉花棉沾上少許凡士林，伸入BB鼻內將軟化鼻屎黐出黎。過程中，父母拇指同食指需掐緊棉花棒棉頭下約1cm位置，即使BB掙扎，亦唔會因而將棉花棒太深入BB鼻腔內，整傷鼻內黏膜。

Photo from Shutterstock

爸媽亦需注意，唔需要太頻繁為BB清理鼻孔，其實BB用手捽鼻係可以將鼻屎捽出黎，但若然鼻屎真係太硬，BB點捽都捽唔出；或覺得鼻屎太大影響BB呼吸嘅話，先至再採用上述2個方法。

Text：Mami Editorial

Photo Source： Shutterstock